Kolum ni Jobert M. Pacnis

(Maudi a paset)

Naalana pay idi damo nga angawen dagitoy: “Attraytis daytan,” kinunana. “Pagilasinan ti panagbaket ken panaglakayyon.” Ngem kinapudnona, maikapat a kataengan iti dagupda a duapulo. Ken isu laeng ti tubuanen ti uban.

Napukaw ti panaglammin a nadlawna iti panagtomarna iti agas a para itoy. Ngem kaskasdi nga aglaladut latta. Kasla mayang-angin.

Nupay kasta, dina impalubos a naglangan. Napateg ti tunggal aldaw a sumrek iti pagadalan. Sa maysa, pampanunotenna ti maikissay iti sueldona no di sumrek— ta awan unay ti makuna a leave credits-na.

Karugrugi ti Intramurals idi mariknana a kasla saannan a kabaelan ti sumrek. Ngem gapu ta isu ti makaammo iti sound system ti pagadalan, pinilitna latta ti simrek. Iti nagmalem, nariknana a dumagsen a dumagsen ti rikriknaenna.

Ket iti maikadua nga aldaw ti Intrams-da, saannan a nabaelan. Inkontakna laengen a di sumrek.

Iti panagpatsek-apna, kinuna ti doktor a mabalin a pneumonia ti kimpet kenkuana. Naalana kano iti panagmaga dagiti ling-et iti bukotna.

Idi a nalagipna ti kanayon a panagling-etna no kasta nga ag-outdoor activities-da kadagiti ubbingna iti TLE. Nairuam ngaminen a kaduaenna dagitoy iti panagdalus ken panagmulada iti garden. Saanna a basta bilinen dagiti ubbing nga agtrabahoda. Saan a basta agbaon lattan ket agtalinaed iti linong. Makigiddan kadakuada. Agpagut iti ruot, agpasapas, agsibog, aggabion, agmula, agpasok ken agalad.

Nalagipna pay daydi aldaw a panagalada kadagiti pandan kadagiti pampantok tapno imulada naimbag la a sarip ti pagadalanda iti umas-asidegen a baybay. Nakipagal-ala iti pandan ta napusgan dagiti ubbingna iti TLE nga agala kadagiti maimula iti naituding a Pandan planting kalpasan ti umuna a periodic test.

Dita ti nangrugianna a naglammin. Ngem kas nasaon, saan a pinaidagel. Pinilitna latta ti simrek. Ket idi dimteng ti panagmumula, adda latta a nabatbati a nagmulmula ta kinitana a naimbag dagiti immulada dagiti amin nga ubbingda.

Kaaduan nga immula dagiti ubbing, PTB a makuna wenno Para Tungpal Bilin. Saan a naikali a naimbag; naikurobda lattan a parparawpaw iti daga/darat. Idi kitaenna ti Facebook-na iti karabianna, agsasarunon iti wall-na dagiti group picture dagiti adviser agraman dagiti ubbingda a likud ti immulada a pandan.

Napangilangil laengen.

Ket naipalagip pay kenkuana a no aggapu iti pagadalan, pagdiretsuanna pay ti bangkag iti lauden ti balayda a pinadalusanna. Minulaanna dagitoy iti nateng idi dimteng ti naatap a tudo. Gapu ta agkurangen ti danum dagiti immulana, kapilitan a sinibsibuganna dagitoy. Permi a madardarugsoy iti ling-et ta nupay malemen, nagbara latta ti sang-aw ti aglawlaw.

Ket dita a simken kenkuana, a narigat met gayam ti nasalukag la unay no maminsan. Iti ayatna nga agbalin a modelo kadagiti ubbingna, ken uray pay iti pagtaenganda—iti imatang dagiti annakna, nakaala ket ngarud iti sagubanitna. Sakit a nangpakapuy iti pakinakemna.

Ti makadakes, nagsasaruno dagiti aldaw a naglangan. Naimbag la ketdin ta addada aktibidad kadagita nga aldaw ket saan a regular ti klase. Inayon pay ti nagsasaruno a holiday ken ti pannakasuspinde ti klase gapu kadagiti bagyo a limmabas.

Ngem nupay saan a regular ti klase, maibilang latta a naglangan.

Iti pannakaidalitna, nagbalin a paratignayna dagiti naaw-awatna a pakomusta iti messenger. Kasta metten ti dungngo ti pamiliana.

No kasta nga agmaymaysa iti pagtaenganda, ta sumrek iti pagadalan dagiti annakda ket masapul a kaduaen ti asawana ti maysa kadagitoy, naikkan iti gundaway a nangparangen iti relasionna iti Namarsua. Ti Nasantuan a Surat ti nagbalin a kadkaduana.

Napatibker iti dayta nga inaramidna. Nagbalin a positibo ti panagkitana iti biag. Saan a pinaidagel kadagiti negatibo a pampanunot aglalo idi manon nga aldaw a kasla awan latta ti pagnaan dagiti ipapaunegna nga agas.

Aklonenna, kadagita a gundaway, naawanan iti namnama. Maalana idin ti aglagaw. Kasano payen ti pamiliana no saanen a makatrabaho?

Ngem pudno la unay a manangngaasi ti Dios. Nakarikna iti panaglag-an iti rikriknaenna. Napayaman iti kasta unay.

Wen, mabalin nga iti panagsublina manen iti imatang dagiti ubbingda, agbaliw ti estratehiana. Ngem kaskasdi a dinto agbaliw ti panangipategna kadagitoy.#