Footer

SINURSURAN: No bilionarioka, aniat’ ubraem?

NAGKAKAUBUSAN na ngayon ng tiket ng ultra lotto 6/58…

Iti panagadda ti kuriente iti purokmi, kalpasan a pinukaw ni Ompong iti 23 nga aldaw, kasta man ti nagbalin nga ulo dagiti damag iti radio ken telebision a naipasabat kaniak.

Nasdaawak idi damo. Apayen?

Ngem nasungbatan a dagus ti saludsodko idi ibaga ti reporter nga immabot gayamen iti bilion a pisos ti mabalin nga abaken iti nasao nga ay-ayam.

Bilion? Nagdakkelen a kantidad! nayesngawko. Umuna iti pakasaritaan ti number games iti pagilian.

Idiay probinsia ti Abra, a taltallo ti lotto outlet-na, nagdadael payen ti kompiuter/makinada. Dina nabaelan ti nagproseso iti kaadu dagiti nagtaytaya ken agtaya koma pay.

Idinto nga iti kaaduan nga outlet iti pagilian, kasla pila ti NFA rice ti kaatiddog ti pila dagiti agan-anus a kailian tapno makapagtayada laeng iti tarakenda a numero.

Iti kadakkel ti premio, asino ngarud met ti saan a maengganio/maguyugoy nga agtaya? Wenno mangigasanggasat iti kuartana? Uray maigatang koman iti bugguong ken daing nga aramang a pagsagpaw iti inabraw wenno pinakbet.

Amangan laeng no isu ti pagdissuan ti gasat.

Ket saantayo a mababalaw dagiti kailiantayo kadayta!

Iti rigat ti panagbiag ita, maysanmaysa ti agar-arapaap a makaalut-ot koma metten. Aglalo ket agtultuloy latta ti panagtayok dagiti magatgatang. Saan a masigurado no kaano nga agngudo. Banag a mangisangsangbay latta iti di magatadan a rigat kadagiti marigrigat.

Uray payen dagiti addaan iti regular a paanggedan.

Daytoy ngarud panagtaya ti nabatbati a namnama ti kaaduan tapno maitarayanda ti rigat. Saan a bale a matagamtamda nga itaya ti para koma iti pamiliada. Atlis, kunada, adda kano namnamaenda.

Saan a kasla kadagiti di agtaytaya a pulos a dinto mangabak. Nga awan namnamaenda!

Ti di mautob dagiti kailian, ti kinabassit-usit ti gundawayda a mangabak. Kasda laeng agitubtubong iti lussok a kawayan wenno piggybank.

Ngem sabagay, irason dagiti dadduma nga iti sangkabassit a maitayada, adda namnamaenda a porsiento a maitulongda kadagiti agkasapulan a kailian gapu iti nakaro a nasakitda.

Wen met ngamin. Paset ti kitkitaen ti Philippine Charity Sweepstakes Office a mangipatpataray iti lotto ti mapan kadagiti kailian a kas tulong kadagiti paggastuanda iti ospital. Bassit man daytoy, dakkel met ti maitulongna kadagiti agkasapulan la unay. Aglalo kadagiti awan namnamaenna a pangalaan.

Pagtarayan dagiti agkasapulan ti PCSO!

Mayatak kadayta a rason. Ngem no iti dayta panangitalektayo iti gasat/suerte iti masakbayantayo, panagkunak, di maitutop.

Adda met laeng iti panagsalukag ti isasangbay ti panagrang-ay. Dayta, a, ket no ammotayo a diskartien ti panagbiagtayo.

Dayta laeng no diskarte a makuna daytoy panagtaya dagiti kailiantayo?

Isu ngata a tapno agdisso kadakuada ti gasat, aglalaok la ditan ti sursurotenda a pammati.

Adda mangyapros iti tiketna iti sikogna wenno sikog ti sabali. Suerte kano!

Adda pay mangtaya kadagiti petsa ti pannakayanak dagiti kameng ti pamiliada.

Wenno bay-anda dagiti ubbing nga annakda a mangted iti numero a tayaanda.

Inobnobenaen pay dagiti dadduma.

Ken dadduma pay a mabalin a mangawis iti suerte kadakuada.

No ngay ngata agsuerteda amin a nagtaya (ta adda latta met pammati a suerte ti tunggal maysa)? Uray bilion a pisos ti premio, sagmamanoda laengen? Sabagay, adayo met ngata nga agpapada amin a numero dagiti adu a kailian nga agtaytaya.

Iti maysa a poste iti Facebook a napalabasko, nasaludsod no ania ti aramiden ni Angkuan wenno ni Kuanang no   mapagasatan a mangabak kadayta bilion a premio.

Sumagmamano kadagiti sungbat: mangipatakder iti bukod a pagtaengan (pagsarmingan nga adu a kailian ti awan pay bukodna a pagtaengan?), gumatang iti napintas ken nangina a lugan, mangipatakder iti negosio, mangilatang iti pagadal dagiti annak, tumulong kadagiti marigrigat, kdpy.

Iti met report iti telebision, adda nagkuna a mangipatakder iti bukodna nga ospital—ospital a pakaawatan dagiti nanumo nga umili uray awan ti kuarta/makukuartada.

No arisiten, nagpipintas man dagitoy a sungbat/plano dagiti kailian. Maidawatmo la ket ngarud nga isuda koma ti pagdissuan ti suerte.

Ti saludsod laeng no tungpalenda inton mangabakdan.

Ngem no sika met ti mapagasatan, saan ngata a napimpintas a daytay kanginaan a lungon ti gatangem?

Ania metten dayta a nasaok?

Kitaentayo, a. Iti panangabak iti dakkel a kantidad, saan ngata nga agpeggad ti biagtayo?

Mabalin a siimendatayo dagiti managdakdakes. Isikatda ti biagtayo.

Saantayo payen a mapagtalkan dagiti adda iti aglawlawtayo. Mabalin ngaminen a mismo nga isudan ti mangisikat kadatayo.

Agbalintayo a managatap. Mapukaw ti panagtalek kadagiti uray kakaasitgan kadatayo. Pagangayanna, agdandanagtayo nga inaldaw. Saanen a marikna ti kinatalged a dati a marikriknatayo idi saantayo pay a dimmur-as iti kasta unay.

Maaddaantayo met iti adu a bodyguard a kas kadagiti politiko? Ngem agnanayon ngata ti proteksion a maipaayda? Kitaen ti aglawlaw, saan kadi a malikidar/maitumba latta met uray dagiti tao nga impagaruptayo nga untouchables?

Kadagitoy a sirkumstansia, saan ngata a maibiit laeng ti apit ti asino man a mangabak kadayta dakkel a gatad?

Ket mayannatup la unay dayta lungon nga umuna a gatangenna no mangabak!

Saan met ketdi a pammutbuteng daytoy. Addan iti indibidual a mangdiskarte iti biagna kalpasan nga inarakup ti suerte. Pagpampanunotan met laeng daytoy.

Ngem masaludsod laeng, an-anuen ti agbiag a baknang no awan ti talna ti panunot ken biag?

Di ngata naim-imbag nga amang ‘tay simple, addaan talna ken kappia ti kaunggan?

Iti met dayta bilionen a gatad ti premio, saan ngata a mabalin nga inayon laengen a pondo ti PCSO? Iti kasta, ad-adu ti matulonganna ken maikadakkel dayta gatad iti listaanna a mabalin a maited iti agkasapulan a kailian?

Ta kuna dagiti nakapadasen a bassit laeng ti naaw-awatda nga ayuda. Depende pay dayta iti kaso ti sakit.

Di ngata mabalin a mangrugi manen iti minimum a premio ti PCSO iti dayta ultra lotto-na. Tapno saan a kasta la unayen ti panangbaliwna iti panagpampanunot dagiti kailian a mangnamnama iti suerte a dumteng iti biagda iti apagdarikmat.

Sikolohikal nga aspeto.

Baka umadu laeng dagiti kailian a sumadut!

Sabagay, adda met laeng kadatayo no paiturayantayo iti dayta panangnamnama lattan iti suerte.

Pinilitayo dayta. Biagtayo dayta.

Ngem pammalagip laeng met ketdi daytoy.#