sinursuran-banner-sqSinursuranNi Jobert M. Pacnis

Sinursuran: Ti Akem a kas Mannurat

Kolum ni Jobert M. Pacnis
(Maudi a paset)

Ket iti pannakaited ti talek tapno aglektiurak, dakkel a banag iti biagko a kas man-nurat. Iti saan metten a namnamintallo a panaglektiur, awan ti sabali a dawatko no di ti pannakaibatik koma iti uray sangkatipping laeng a pannakaammo. Nagbalin pay daytoy a rangtayko tapno in-inut a maikkatko (nga adda pay laeng bassit a nabatbati) ti kinamanagbabainko nga agsao iti tallaong.

Iti kaadda daytoy MTB-MLE a programa ti Sistema ti Edukasion iti agdama, addada dagiti pagadalan a mangaw-awis iti grupomi ditoy Tanap tapno manglektiur kadakuada (kangrunaan dagiti titser iti Grado Uno agingga iti Grado Tres). Kayatda a masursuro ti pagsasao nga Ilokano— ti ortograpia ken grammar-na—nga isuroda kadagiti adalanda. Ta akuenda, marigatanda la unay dagitoy a mannursuro ta iti Filipino ken Inglisda a batido. Banag a nakakaskas-ang. Bukod a pagsasao ti tinallikudan.

Ngem ti napateg ditoy, ammoda nga aklonen ti pagkurkuranganda. Saanda nga aginlalaing gapu ta mannursuroda. Saan a kas kadagiti dadduma a kasla ammodan ti amin. Saan kano a napateg pay dayta grammar ken ortograpia kadagiti panagisuroda iti Ilokano.

Anian a panagut-utek!

Nupay kasta, adda met dagiti mayat a mangilungalong iti seminar/lektiur tapno makasursuro dagiti adda iti babaenda. Ngem yanna manen nga adat, adda pay laeng dagiti nangatngato a masapul a mangaprobar itoy a gannuatda. Ket dagitoy nga apoapo ti mangbangen iti nasao nga addang ta ipato dagitoy a makompetensiada kadagiti akemda. Adda ‘tay amakda a ti grupo dagiti mannurat ti kasla mangibaba kadakuada ken kakompetensiada iti isyo ti pirak.

Napait daytoy a kinapudno. Ngem nagbalinen a kapadasan ti grupomi. Kayat laeng koma ti tumulong kadagiti mannursuro. Siaayat dagiti mannursuro iti elementaria iti maysa nga ili ditoy Tanap a mangangay iti seminar. Inaprobaran payen ti district superbisor. Pagdaksanna, idi mapan ti surat iti ngato, ditan a naarang. No ania a rason, awan ti nalawag a naibinsabinsa. Ti ketdi nalawag, saanda a kayat a bumibiang ti grupomi iti daytoy a pakaseknan dagiti mannursuro iti Grado Uno agingga iti Grado Tres. Saan met ngarud a makuna a pannakibiang daytoy. Pannakibinnadang, dayta ti umisu a termino. No iti talent fee dagiti maala nga aglektiur – ta saan met nga amin iti grupo—ket nabayag metten a serbisio ti pampamay-anmi kadaytoy. Kinapudnona ngarud, dimi payen innala ken ni kamannurat Johmar R. Alvarez ti TF-mi iti panaglektiurmi iti kallabes a kombension ti GF. Ta di met a dayta ti napateg.

Kalkalpas manen ti seminar/panaglektiur iti ili ti Sta. Teresita ditoy probinsia. Nupay moderator, saan nga aglektiur, ti akemko ditoy, diak nagpangadua a napan. Segun ken ni Mam Agatha Sotelo nga organizer, ken prinsipal ti Masi Elementary School, nakiddit latta ti suporta dagiti adda iti ngato kadaytoy nga addangna a mangtulong kadagiti titserna. Ngem saan a nagbalin a lapped kenkuana daytoy. Intuloyna latta ti ammona a makatulong saan laeng a kadagiti mannursuro no di ket kangrunaan dagiti ubbing a masursuruan. Inranana iti aldaw nga awan serrek tapno di madaksan iti ngato.

Ket napasamak ti inar-arapaap ni Mam Sotelo kadayta nga aldaw ti Setiembre 14—nga isu met ti isusungad ti bagyo (Luis). Naparas ti gymnasium, ta awan siparna, a nakapasamakan ti seminar/lektiur ngem di a daytoy ti nangtellay iti pasken. Naisayangkat latta a sibaballigi iti baet ti panangay-ayam ni Luis kadagiti kayo iti aglawlaw ti pagadalan.

No awag ti akem, awan makalapped, kunada man. Ket napalaus man ti ragsakmi nga agkakagrupo ta sabali manen a gannuat ti sibaballigi a napasamak.

Padpadaanan manen itoy a Setiembre 27-28 ti pannakaangay manen ti maysa pay a seminar/lektiur iti Marag Valley (No Man’s Land idi 80s), Luna, Apayao. Kiddaw met laeng daytoy dagiti mannursuro sadiay. Ken iti maikadua a lawas ti Oktubre, sabali pay a lektiur/seminar ti maisayangkat sadiay ili ti Gonzaga, Cagayan. Saan laeng a dagita. Addada pay main-inaw a sabali a seminar/lektiur kadagiti kabangibang nga ili.

Wen, ti kinamannurat, kakuykuyogna ti akem a mangtagiben iti nakayanakan a lengguahe. Daytoy nga akem, maipatungpal nga awan panaginkukuna. Ket nagpaiduma a ragsak ti umarakup iti pannakaakem dagiti pagrebbengan. —#