sinursuran-banner-sqSinursuranNi Jobert M. Pacnis

Sinursuran: Ti Akem a kas Mannurat

Kolum ni Jobert M. Pacnis
(Umuna a paset)

INARAPAAPKO ti agbalin a mannurat. Rimtab daytoy iti panagbasabasak kadagiti komiks idi addaak iti haiskul. Daytoy man ti nagbalin a bisiomi nga agbabarkada. Kalpasan ti klasemi iti malem, pagdiretsuanmi ti kakaisuna a newsstand iti ilimi. Agarkilakami iti komiks a basaenmi. Salapi ti maysa.

Kagiddan daytoy a pannakaadik iti komiks ti pannakaadikko met nga agbasa iti Bannawag. Mangilasinak iti dua pisos iti balonko iti inaldaw tapno addanto igatangko iti kopia ti magasin inton addan—a kadawyan nga iti aldaw ti Huebes wenno Biernes. Unaek a basaen dagiti komiks. Idi agtanoy, dagiti daniw metten ti mangag-agaw iti imatangko.

Pinadasko ti nagputar iti daniw. Insuratko dagitoy iti notebook-ko. Kayatko ti agipatulod iti magasin ngem anian ta adda dayta panagamak iti kaunggan. Ken maysa, diak pay ammo no kasano. Saanak pay idi a kameng ti ania man a grupo dagiti mannurat.

Indiretsok ngarud kadagiti programa iti radio dagiti nabukelko a daniw. Nagallangogan dagitoy iti Tanap. Uray la a tallo nga estasion ti pagsursuratak. Nagbalinak la ket ngarud nga instant celebrity iti pagadalan. Yanna a pagdaksan, awan man laeng nga imnas wenno mutia ti nangipateg kadagidi a dandaniw.

Wen, adda met nakaisangratan a mutia dagidi a putarko. Ngem anian, nagbalin a naatap kaniak. Gapu ngata ta makitkitana idi a nagkaadu dagiti agsangpet a penpal-ko a naggapu iti nadumaduma nga ili iti Tanap? Saanko met a mabalin a paritan dagitoy ta agtamedda kan’ met kadagiti mangmangngegda a sursuratek (anian!).

Dagita ti nagbalin a konsolasion iti panagsuratko iti radio. Saanak a naib-ibusan iti kinasinnurat. Ngem nupay kasta, awan ti nakaagaw iti papel ti mutia dagiti daniwko.

Ti ammok idi, agpatinggaak lattan iti radio. Dimteng kaniak ti pannakauma nga agdaniw iti radio. Pinadasko ti nagikur-it iti sarita iti notebook-ko. Anian a ragsakko ta rimmuar daytoy iti magasin kalpasan ti dua a tawen a panangiduldulinko. Daydi ngatan ti maysa a kararagsakan a paset ti biagko. Urayko la inlagtolagto iti kaserak (ta addaakon iti Maikadua a Tukad ti kolehio idi).

Sipud idin, gimmagetak a nagsurat. Ngem sa la nasunotan daydi a saritak kalpasan ti tallo a tawen. Dandaniw ketdi ti nangitalimudokak iti atensionko kalpasan daydi a saritak.

Iti panagtultuloyko nga agsurat, nupay agtultuloy latta ti rejection (a maysa a karit iti panagsurat), immadu dagiti naam-ammok a mannurat. Nakadinnakulapkon dagiti aydolko nga iti kaano man diak pinanunot a mapasamak a kasta. Dakkel ti naitulong daytoy iti panagsantak pay ti plumak. Sinnukat iti kapanunotan; sinnakdo iti adal, sinninged iti langenlangen ken panagaammo nga awan ressatna.

Ngem saan ketdi a naannayas latta ti taray amin a panagaammo, panagiinnabrasa. Kayatko a sawen, addada met latta dagiti masagang a nakatukno iti atang. Isuda dagitay naglaing a sumanao, kunam no isudan ti kalaingan. Ngem pudno la unay a dagiti nalaing nga agsao, pangtakkabda laeng iti kinaawan ammoda.

Iti panaglabas ti panawen, adtoy a mapaspasamak ti maysa pay a diak inarapaap—ti manglektiur kadagiti pada a mannurat ken dagiti mayat nga agbalin a mannurat. Pasamak daytoy nga iti kaano man, diak talaga inarapaap.

Diak kunaen nga ammok aminen nga usok iti panagsuratan. Kuna ngarud dagiti bangolan a mannurat a nakasarsaritakon: iti panagsuratan, agtultuloy a panagadal ken panangasa iti kabaelan. Saan nga agsarday dayta a proseso. No insardengmo kanon ti nagsursuro, kayarigamon ti maysa a nalamiis a bangkay.

(Adda tuloyna)