sinursuran-banner-sqSinursuranNi Jobert M. Pacnis

SINURSURAN: Ti mensahe ti ubing iti kulluong

“INTAYO man idiay parke, ‘pang,” kinuna dagiti ubbingko iti dayta a malem. Agum-umbida.

“Ubraentayo idiay?” inamadko met.

“Kayatmi a makita ‘diay ipatpatakder da amang.”

Amang, dayta ti pangawagda iti kasinsinko a hepe dagiti tanod iti barangaymi. Nairuamdan dayta nga awagda imbes koma nga angkel.

Kadua da kasinsin dagiti opisial ti barangay ken dagiti mannursuro iti elementaria iti ipatpatakderda a Christmas village idiay parke ti ili. Maysa daytoy a salip a pakaitedan iti dakkel a premio dagiti mapagasatan.

Tema ita a tawen dagiti pagtandaan (landmark) dagiti nadumaduma a pagilian. Nagbibinnunotan dagiti nasurok a duapulo (19 a barangay a kaduada ti elementaria sa nainayon dagiti tallo a hayskul ken dagiti dadduma pay a grupo) no ania ti pannakabagida. Ti landmark ti Dubai ti naipatang iti barangaymi.

Saanakon a nagkedked aglalo idi ibaga ni baket nga iti dayta nga aldaw ti deadline ti panagramid iti Christmas village. Ngarud, nakasaganan daytoy a silawanda apaman a sumipnget.

Nalawag pay laeng idi makadanonkami iti parke. Makumikom dagiti maseknan a mangilepleppas kadagiti entry-da. Nailapayag kadakami nga iti pay la gayam alas dose iti tengnga ti rabii ti deadline.

Uray awan pay silaw dagiti landmark a nadanonmi, kasta unayen a ragsak dagiti ubingko a nakaimatang kadagitoy. Permi a panagpaalada iti ladawan– uray adu dagiti agserserbi a background a kailian a madama a mangileppas kadagitoy.

Maayatanda la unay kadagiti landmark. Adda dita ti Pyramids of Giza, London Eye, Sydney Opera House, Statue of Liberty, Christ the Redeemer, Petronas Tower, Leaning Tower of Pisa, Sagrada Familia, Taj Mahal, Merlion ken adu pay.

Ad-addan ti ragsak dagiti ubbingko idi sumipngeten. Nagangtanen dagiti silaw dagiti landmark. Nakangayngayeden ti aglawlaw. Saandan a paanawa. Tarayda a taray a maay-ayatan.

Iti nakain-inosente a kinaragsakda, saan a diak nalagip met ti kinaubingko. Pudno, idi panawenmi, awan pay ti kastoy a buya iti parkemi. Kinapudnona, maikadua pay laeng a tawen daytoy salip ti kinnapintasan iti Christmas village. Sakbay daytoy, panagaramid iti parol ti napagsasalipan. Kadawyan a maibitbitin laeng dagitoy iti pakabuklan ti munisipio.

Ngem idi dakami, umanayen dagiti naibisti a Christmas lights kadagiti mula ken kayo iti parke. Sa laeng madlaw ti ngayedda no kimmagaten ti sipnget. Isu a saan a kasta kaaduna dagiti agpaspasiar iti parke uray no kaaldawan payen ti Paskua.

Umanay idin a ragsakmi nga aggagayyem ti panagkarolingmi iti bisperas ti Paskua ken Baro a Tawen. Ta uray idin, addan mangngeg a nagubsang a sao no nasapaka unay a makipaskua (nasapsapa ngem bisperas ti naituding nga aldaw). No maminsan, makadandanonkami idiay ili su a makitkitami no ania dagiti nakabisti iti parke. Ditakami payen nga agbibingay kadagiti naaginaldomi.

Naragsakkami idi uray sagbibinting laeng dagiti maaw-awatmi nga aginaldo iti tunggal pagtaengan a kantaanmi. Uray pay tinupig wennno patupat laeng ti mayawat kadakami. Saanmi nga ugali ti agkanta iti Bulong Ti Apatot (a nagbaliw ti panagkitak kadaytoy idi trinatar ni Manong Jimmy Agpalo, Jr. ditoy TNM) no adda mairana a pagtaengan a di manglukat.

Mapmapnek pay idin ti rikna no kasta a kabadang ni tatang nga agaramid iti tinubong. Kaduaek a mapan agpukan iti kawayan nga usarenmi uray no buybuyaek laeng. Diak kano pay kabaelan ti agpukan. Amkenna no mapatitak iti pakaputdan ti kawayan.

Apaman a maisangpetmi ti kawayan iti balay, gupongenna dagiti linawas daytoy babaen ti ragadi. Kukuakto metten a kayasan dagiti nagupongna.

Kalpasanna, pardasak ti mapan agala kadagiti nagango a bulong ti saba a pagsullatmi iti tinubong. Sako ti pagikkak. Napia laeng ta kasabaan ti aglawlaw ti balay. Natemplanto metten ni nanang ti bellaay inton makaalaak iti pagsullat. Agtitinnulongkaminton nga agitubong kabayatan nga isagsagana ni tatang ti abut a paglutuanmi.

Simple nga aramid ngem mangipapaay iti ragsak kaniak kadagidi a panawen. Bantayanmi ken ni tatang dagiti malutluto a tinubong ta narigat ti maksetan. Aguanta isublimi dagiti sullat nga ikubuag ti malutluto a bellaay. Dayta ti karigatan a paset ti panagaramid iti tinubong. Pudot ti kalaban.

Adda idi aramidko a diak malipatan. Irantak ti mangibati iti gatas iti lata daytoy. Kasta metten ti pasas nga ilaokmi. Mangilasinak iti maysa a tubong nga ibuntokko amin ditoy dagiti imbatik. Sa ikkak iti senialna (tikap iti ubet ken ngarab ti kawayan) tapno ammokto met laeng inton maluto. Baka mairana nga adda pakaibaonan ket saan a siak ti mangadaw inton maluto dagiti tinubong. Maymayat no masenialan met laeng.

Nakaim-imasto man iti panagramanko iti kabigatanna. Duma ngamin ti imas ti nabaaw a tinubong. Makaay-ayo ti simple a ramanna no kimpetton ti kulapot ti kawayan. Saanto payen a napigket nga iggaman apaman a maluktan.

Ngem naglabasen dagidi. Iliw ken lagip laengen ti panagaramid iti tinubong. Naikisap ngaminen dagiti kawayan a pagal-alaanmi. Nagdadawelan dagitoy dagiti ‘donia’. Awan imbatida a rabong agingga a naibus dagiti kawayan.

Pagyamanan ketdi ta adda latta met maramanan a tinubong uray saanen a bukod nga aramid. Pinagbalin a negosio ti maysa a kasinsinko ti panagaramid iti tinubong. Uray saanna a panawen, no makakakkakaankami, mapanak laeng gumatang kenkuana. Apagbiit ti panaglutoda. Naaladan ti umno a teknik uray no abut latta ti paglutlutuanda a kas iti abut a paglutlutuanmi met laeng idi. Saanen a kas idi nga agmalmalem ti panagluto iti tinubong manipud iti pannakalingtana agingga a maituno ken mailinay.

Ti rigaten laeng da kasinsin ket ti pagalaanda iti usarenda a kawayan. Naibus, kas nasaon, iti purokmi. Isu a makadandanondan kadagiti adda iti un-uneg a barangay ti ilimi. Nayon a gastos dayta kadakuada.

Dagidi a babassit a bambanag a tagiragsakenmi, narigat itan a maimatangan kadagiti ubbing. Mapalpaliiw a manmanon kadakuada ti mapan agkaroling. Awanen ti panawenda. Maysa a rason ditoy ti kaaddan dagiti gadget a pangibusanda iti oras. Pagsadutandan ti agkantakanta kadagiti balbalay. Bannog kano laeng. Uray ta adu kano met ti saganada a nabaknang a taraon.

Ken ti dakkel a rason ita dagiti dadduma a nagannak a mangipawil kadagiti annakda nga agkaroling ti kinadelikado kanon ti aglawlaw. Iti panagraira ti maiparit nga agas, uray adun dagiti natokhang, agsasamusam a krimen ti mapaspasamak. Dayta ti pagam-amkan dagiti pada a nagannak.

Iti panagawis dagiti ubbingko, saanko nga impaidam kadakuada dayta. Manmano dagiti kasta a gundaway.

Ken pudno la unay a ti Paskua, para kadagiti ubbing. Rumbeng a maiparikna kadakuada ti kinapateg ken kinaania dayta nga aldaw. Saan a nakasentro kadagiti namaterialan a bambanag. Ipaawat kadakuada ti simbolo nga adda iti ubing iti kulluong a puon ti rag-o ti sangalaubongan.

Naimbag ta nairaman kadagiti landmark iti Christmas village ti Sagrada Familia ken Christ the Redeemer. Gundaway daytoy a mangilawlawag kadagiti ubbing ti kinapateg ti Paskua. No ania ti pudpudno a Paskua.

Nalabit nga ubing pay ti panunotda. Ngem agserbi dagitoy a bukel a maitukit iti panunotda nga iti panagalabas ti panawen, agrusing ket in-inut a maawatandanto ti amin.

Intayo ngarud agkaykaysa a mangparagsak kadagiti ubbing itoy masungad a Paskua. Awan iti kinagarbo ti mangparagsak kadakuada. Adda iti langenlangen nga ipamatmat ken iparikna kadakuada.

Ta ayat la ngarud ti mensahe ti tunggal pannakarambak ti pannakayanak ti ubing iti kulluong! #