Footer

Sipat iti pungupunguan

Nakedngan a nakabasol ni Lintang Bedol, ti provincial election supervisor iti Maguindanao, iti indirect contempt ket sinentensiaan ti Commission on Elections a mabalud iti agingga iti innem a bulan ken mamulta iti P1,000.

Ngem pinalubosan met laeng ti Comelec ni Bedol nga agpiansa iti P15,000 para iti temporario a wayawayana. Posible pay a mangipila ni Bedol iti petision para iti rekonsiderasion iti sentensia ti poll body.

Adu ti saan a napnek iti pannusa nga impataw ti Comelec iti kontrobersial nga election officer.

Kinuna ti oposision a maysa laeng a sipat iti pungupunguan ti pannusa ken ni Bedol.

Kuna met ti abogado ni naabak a kandidato para senador Coco Pimentel a nalag-an unay ti panangtratar ti Comelec ken ni Bedol iti baet ti mapapati a sapasap a panagsuitik iti election iti Maguindanao.

Madakamat ditoy a nasurok a 110,000 ti pangab-abakan ni Pimentel ken ni Miguel Zubiri a kinalabanna iti maika-12 a puesto ngem idi makambas ti butos iti Maguindanao, inlupeklupek ti naudi ket napadisi iti magic 12.

Impilan ni Pimentel ti protestana kontra Zubiri iti Senate Electoral Tribunal.

Adda pay dagiti sungbatan ni Bedol kas iti alegasion a naipanurok a panagsuitik iti eleksion a nakaitbongan iti 19 a kandidato para senador kas imbulgar dagiti mangisursuro ken ti pannakapukaw dagiti municipal certificates of canvass nga inakas ni Bedol kadagiti municipal election officers.

Iti eleksion idi 2004, nairaman a nadakdakamat ti nagan ni Bedol iti Hello Garci tapes ken iti alegasion iti panagsuitik iti eleksion. No apay a saan a naimbestiga iti akemma iti alegasion a panagsuitik ti narigat a maawatan.

Rumbeng laeng nga idaras ti Comelec a paimbestiga no ania ti pudpudno a napasamak iti Maguindanao. No mapatalgedan a pudno dagiti alegasion, saan koma a bumdeng a mangited iti kadagsenan a pannusa ken ni Bedol.

Ta no saan, awanen ti matda iti sangkaballing laengen a kredibilidad ti Comelec. Awanton ti mamati iti poll body, nangnangruna kadagiti mararaem a komisioner.

Masipsiputan ngarud dagiti sumaruno nga aramiden ti Comelec tapno maiwalinna ti maysa a ramayna a mapapati a naisawsaw iti panagsuitik iti napalabas nga eleksion.#