Footer

Sir Jaybert (Maikatlo a paset)

Kinapudnona, namimpinsan a nagnadnad ti riknak a nalaka nga agpungtot kadagiti buong ti ulo nga ubbingmi. Inspiradoak iti inaldaw. Kinunkunak iti isipko nga awatek ti galad dagiti ubbingmi. Siak met la ti agsagaba no managpupungtotak. Ay, kasanon ti riknak no nasapaak a mahayblad?

“Makakadlaw na nikaw, sir. Kefyafya na mutung mu nga kaggagaw. Inaya kana na tolay nga at-atturam mu?” impasabat ni Ma’am Bheng idi mapasungadannak iti office. Kalkalpas ti umuna a klasek iti malem.

Madlawanna kano nga inaldaw a kasla inspiradoak ket damdamagenna no sinungbatannakon ti ay-ayatek.

Kasano a diak naisem a simmungad ket nasabatko ni Ma’am Joelyn iti pathway iti papanna iti sumaruno a klasena.

“’Yannan ‘tay saritam, sir?” sinaludsodna pay ngarud.

“Bareng mai-final-ko’ton rabii, ma’am,” insungbatko. “Ipabasak ‘ton bigat.”

“Namnamaek dayta, sir…” medio intapikna pay iti takiagko.

A kasla nangitunda manen kaniak iti kaulpan. Ket kasla marikriknak latta dagiti dakulapna iti abagak.

“Kasta ti agay-ayat, bez,” kinuna ni Ma’am Dianne. “Sir Jaybert,” kinitanak, “agpa-softdrinks-kan, a!”

“Inkayo mangalan iti kantina, ma’am,” insungbatko. “Pailistayo pay la ti naganko,” inkatawak.

“Agpayso, sir?”

“Wen. Yagawayo ket no ibabawik.”

“NAGKAS-ANGEN ti kabibiag ‘toy bida, sir,” kinuna ni Ma’am Joelyn apaman a nabasana ti sarita iti kabigatanna. Sinangonak iti lamisaanko idi isublina iti hard copy ti sarita nga intedko kenkuana sakbay ti flag ceremony.  Bakantemi.

“Aniat’ makunam, ma’am?’ inamadko ketdi.

“Maasianak iti bida, sir,” inngilangilna. “Nagadu ti sakit ti nakem a nagpasaranna. Ngem inaklonna latta dagiti nagkamtudan ti asawana.” Kinitanak. “Adda ngata pay kasta a lalaki kadagitoy a panawen, sir?”

“Siak, ma’am,” diak ammo no nangal-alaak ti turedko a nagkuna.

“Owww?” intapikna nga immusiig kaniak.

Nga uray la nagkulibagtongan ti riknak.

“Naggasat ketdin ti babai a pangisagutam iti dayta ayatmo, sir,” kinunana manen idi diak nakasungbat a dagus.

“Sika dayta pangisagutak, ma’am, no maikari,” innalakon dayta a gundaway. Nalagipko ti nakasurat iti likud ti maysa a bus idi agbasbasaak pay idiay Tuguegarao: Apay, Kapuy?

“Alla, alla, ney…” agkakamakam a babassit a kuddot ti nalak-amko.

“Adda kadin agtagikua ‘ta pusom, ma’am, tapno pamkuatak nga agsanud?” Saanen a corny ti pangipapanko kadagita a pagteng.

“Dika man, sir,” kinunana a nakaisem. Timmakder. “Inta ketdin agmerienda. Mabisinakon.” Timmallikuden.

Sinurotko. Naipasabat kaniak ti ungor dagiti agburak a dalluyon ti baybay iti amianan ti pagadalanmi.

SAAN nga inkedked ni Joelyn ti numero ti selponna idi dawatek kadagiti simmaruno nga aldaw. Babaen ti text and call, sinurnadak ti naiparipiripko a kaririknak.

Ngem pamrayanna a baliwan ti saritaan no kua.

Maawatak met ketdi. Nasaona iti naminsan a kayatna pay a pagadalen ti buridekda nga addan iti maikadua a tukad ti kolehio. Kas kenkuana, kinamannursuro met laeng ti kursona.

ITI chatroom-mi kadagiti barkadak a mannurat, napagpapatanganmi dagiti piesa nga isalipmi.

Allon: Padasek manen ti sumalip ita. Iti benneg ti agdadamoak yantangay mabalinak pay.

Rico: Diallo, awan pay nabukelko. Busy ti tolay iti bassit a negosio.

Lando: Ngannganikon maileppas ‘toy para Cortez awards.

Ferdie: Talekmo pay, bayaw.

Bonnie: Ket ‘tay para Gabat Prize-yo, kakadua?

Lito: Aniat’ temana itayen?

Bonnie: Open. Koleksion ti sangapulo a daniw.

Lito: Bareng adda mabukelko.

Elmer: Inatiwnakayon ni Terio! Nakadiakpat iti premio iti kadadaniwna!

Ni Terio nga innalana a drayber ti kayatna a sawen. Agkailianda. Sumagmamanon a daniw, sarita ken salaysay ti naipablaakna iti Bannawag. Atanudko ta inanakko iti buniag ti maikatlo a putotna.

Siak: Kasano koma ket dayta met la agdandaniw iti radio ti as-asikasuenna. Saan payen a makaipablaak uray para ubbing laeng!

Elmer: Dayta ngarud ket. Adu ti dumdumngeg a mangid-idolo kenkuana. Iti dina ninamnama… Uhu, Terio, agkimawka man ta sika ti agistoria…

Terio: He-he-he!

Elmer: Adda nagpaasembol kenkuana. Ha-ha-ha!

Itong: Appoowww!

Siak: Nagpaasembol nga?

Elmer: Kapuymon, ‘ya! Kasla saanka a mannurat!

Terio: Nagpaaramid iti ubing, atanud!

Siak: Lunga’!

Elmer: Pudno… mapaneknekak! Made from Alsur.

Ti nalatak a hotel iti siudad ti kayatna a sawen ni Elmer.

Yuri: Taltalekmo pay, atanud Terio!

Siak: Kamatennaka ita dayta, atanud. Armalaytennaka la ketdi ni ‘Mari.

Terio: Seyptiak, boy…

Boy, ti nainkabsatan a panangaw-awag ni atanud ti asino man kadakami. Natuladna dayta iti agnagan iti Mikiong a padami a mannurat nga agkuykuyakoy itan idiay Hawaii.

Siak: Seypti nga? Maammuan ni baketmo, ‘tanud…

Elmer: Awan met mangipulong, he-he-he! Sa maysa, anak laeng ti gamgamgamen ‘diay babai. Saanna a kayat ti paikasar ta isu pay kano a problemana.

Siak: Kasta itan dagiti babbai?

Terio: Umad-adu ti bilangda, boy. Dayta nagpaasembol, natnagen iti kalendario gapu iti agsasaganad a panagab-abrodna. Ket sakbay kano man laeng nga agkeppet ti baimbain, maaddaan iti anak a mangbadangto kenkuana iti panagbaketna.

Bin-ig a seen dagiti kakaduami.

Siak: Nagsapul koma iti awan pay ti sungsungbatanna iti biag, a.

Elmer: Napipia kano dagiti naasawaanen ken addan nakemna ta mannakaawat. No ubing kano pay, baka no agkamat wenno ageskandalo ta damona ngarud a putot kas pangarigan.

Terio: Sa maysa, boy, maysa met nga adik iti dandaniw iti radio isu a nagsapul iti kapadana ti pagesman. Ket siak dayta naidolona, he-he-he!

Napapanunotak. Istoria kad’ la da Terio ken Elmer daytoy? Pudno ngata nga addada babbai itan a kasta ti paniriganna iti biag?

Siak: Diak latta mamati!

Terio: Adda kenka, boy…

Itong: Sikan ti petmalu, Kompad Terio! Lodi!

MANIPUD nabasa ni Ma’am Joelyn ti saritak, rinugiannan a buloden dagiti libro ti sarita, daniw ken nobela a makitkitana a basbasaek no kasta a bakantek. Siempre, kaykayatak ta mayasideg kaniak. Ket gundawayko a mangsurnad iti naipalgakkon a riknak. Ngem kaskasdi a yaleng-alengna.

MAUDI a lawas ti Oktubre. Bakasion dagiti ubbingmi. Isuda laeng. Dakami, In-Service Training for Teachers wenno INSET-mi. Naimbag ta school-based, saankamin a mapan makitipon kadagiti dadduma a pagadalan a sakup ti distrito.

Maikatlo nga aldaw ti makalawas nga INSET. Adda napateg a seminar a dinar-ayan ni Sir Rilo a kailian ni Ma’am Joelyn a kadkaduana nga agaw-awid.

Idi panagaawiden, inasitgannak ni Ma’am Joelyn.

“Makikaluganak man,” inyumbina.

Ne, awan metten ti ‘sir’-na! Kaslaak la agtatapaw iti ulep kadayta a nangngegak. Motorsiklo laeng ti luganko.

“Basta sika, ma’am,” kinunak metten, a. Apay, asinoak koma nga agkedked? Pabor manen dayta kaniak!

(ADDA TULOYNA)