Footer

Sir Jaybert (Maudi a paset)

Inunormi ti agpasentro nga aspaltado a kalsada a sobsobra dagiti bagon a nagbunag kadagiti blacksand, dua tawenen ti napalabas. Permi a maitaytayokak iti agadiwara a banglona. Nasurok a sangapulo minuto ti biahemi, awan ngata ti magudilak? dayta ketdin ti nagay-ayam iti utekko.

“Saanka unay nga agpalikud, a,” kinunak idi nakaruarkamin iti pagadalan. Inikkatko metten dayta ‘ma’am’.  “Matnagka.” Panagriknak, sangadangan ti nagbaetanmi.

“Tse!” impugtitna. “Prenokanto pay a preno!”

“Nasingpet atoy, ‘nia?”

“No matmaturogka ngata, a.” Ney, ta game gayam a makiangaw.

“Ad-adda manen a sumingpetak no sungbatam ti nabayagen nga idardariragko,” intirak manen. Medio intaliawko pay kenkuana.

“Ney, ‘ta panagmanehom ti kitaem,” inkuddotna ketdi iti napino iti takiagko. Nariknak lattan ti idedendenna. “Madisgrasiata.”

“Saankonto nga itulok a magarumiadanka,” sige, bagi, pagsasaganadem, kinunak iti isipko.

“Ngem riknakto ti sugatam.”

“Saan, a.” Anian, iti pay panagmotormi a napasamak dagitoy nga eksena.

“No diak pay ammo a nagadu nga ubbingtayo ti nalimed nga agay-ayat kenka.”

“Bay-am dagidiay. Crush laeng ti marikrinada. Ubbingda pay.” Diakon innayon, siempre, ti iseseggar met ti riknak no agampiangda kaniak. “Saankonto ida a sungbatan,” inkatawak.

“Agpayso?” Awanen ‘tay sangadangan a baetmi iti panagriknak.

Kapuyak laengen no diak masirok dayta nga inaramidna. Itarapnosko koman iti ilida ngem inatipanak.

“Diak pay kayat a makitanaka ni tatang,” kinunana.

NAGBALIN a napaypayso a maris-rosas ti aglawlawko kadagiti simmaruno nga aldaw.

“Agpaalakan, a, sir,” pagammuan ta kinuna ni Ma’am Dianne iti maysa a breaktime. Addakami amin iti office.

“Apay, ma’am?” inamadko. “Saanko met a kasangay.”

“Ammomin, sir,” insarurong ni Ma’am Bheng. “Dakayon ken ni Ma’am Joelyn.” Inkatawana. “Saan kadi?”

Napakudkodko pay ti ulok. Nagsapa man a nakasaepda.

Kinitak ni Joelyn. Nakadumog ken bangbangir ti isemna.

“Kaano, ‘ya, ti pannakalanit ti bituka?” sinaludsod ni Ma’am Vida.

“Mabiiten, ma’am,” kinunak a pangtestingak ken ni Joelyn.

Urayda la nagpapalakpak. “Agpaalaka ngaruden, sir! Mabisinkamin!”

Ngem idi kitaek ni Joelyn, dinilatannak ketdin.

“UMAYAKTO pumasiar idiay pagtaenganyo ‘ton bigat,” kinunak ken ni Joelyn iti dayta a malem ti Biernes. Agturongkami iti office ta nalpasen ti maudi a period.

“Saan a mabalin!” immatap dagiti matana.

“Apay? Kayatko a maam-ammo da nana ken tata.”

“Agungetda. Adda karik kadakuada a pagbasaek pay ti kabsatko sakbay a makirelasionak.”

“Mabalinmo latta met a pagbasaen uray pay no agsimpatanton no umannugotka.”

“Hmmmppp… diak pay kayat!”

“Lumakayakon…”

“Heh!”

MAYSA nga aldaw, damag laengen a nakaalan iti item ni Joelyn iti ilida. Kellaat a nanglaylay ti maris-rosas nga aglawlawko. Corny, ngem agpayso. Mayadayonton kaniak.

Kasaritak koma ngem isu metten ti yuumayna iti SSG office a nangipudnuanna iti kasasaadna. Ngem imbes nga aklonenna ti diayak a panagsimpami, kunana ketdin a dina kayat ti paikasar kaniak. Saanko payen a nadamag no pudno nga umakar.

Saankami a nagkita iti kabigatanna dayta nga aldaw ta nagpa-Division Office. Adda la kano ipasana a papeles para iti naan-anayen a yaakarna.

Inkeddengko a kasaritak inton agreport ngem anian ta isu ketdin ti pannakaibaonko iti makalawas a Regional Leadership Training iti kabangibang a probinsia.

Tinawagak, impatulodak iti mensahe, in-chat-ko ni Joelyn bayat ti kaawanko ngem saannak a sinungbatan. Iti maudi nga aldawko iti training, nadamagko laengen nga immakaren.

Inkeddengko a sarungkarak iti balayda apaman a malpas ti training.

Isu met nga adda mensahena iti messenger:

Jaybert,

Sigurado, ammomon nga awanakon iti pagadalantayo.

Ladingitek ti awan ti nalawag a panagpakadak kenka. Ken saanko nga imbagbaga ti panangipagnak kadagiti papelesko para kadaytoy.

Marigatanak nga agbiahebiahe iti inaldaw. Didak met ngarud palubosan da tatang ken nanang nga agkasera.

Nasaok met laengen da tatang ken nanang, ipamaysakon. Awan ti aldaw a di mabartek ni tatang. Karkariarenna ni nanang. Kakaasi. Papelko lattan ti mangan-anawa ken ni tatang no kasta a kabilenna ti inami. Sangsangitak ti gasat ni nanang. Sangsangitak ti gasatmi.

Daytoy ti diak pangayatan a sumarungkarka iti balay. Mabainak. Sapay la koma ta maawatannak.

Isu pay nga inkagumaak ti umakar tapno as-asideg laeng a pagtarayak no kasta nga agkuerong ni tatang. Amkek ti pannakadisgrasiana ken ni nanang.

Gapu kadagitoy a mapaspasamak iti pamiliami, bumdengak a makirelasion, inayon payen ti obligasionko iti kabsatko, ta amkek no makasarakak iti kas ken ni tatang.

Ammok, saan nga umisu daytoy a pagrukodak. Ngem mababalawnak kadi no mabutengak? 

Impettengko iti bagik a dikanto sungbatan. Ngem in-inut a natnag ti riknak gapu iti kinaimbagmo, iti nakitak a kinaawan ti bisiom… Ken nalaingka pay a mannurat! Banag a nakabaludam la unay kadaytoy pusok.

Ngem saan nga immanay dagitoy tapno maunasda ditoy isipko dagiti aliaw a yeg ti pannakiasawa.

Ti imetko ita nga ubing, aklonek a nagayatak met. Kayatko, adda pakalaglagipak kenka.

Saannak koman a suroten pay. Wenno sarungkaran. Pangngaasim. Kayatko ti makalipat a dagus. Ipapanta laengen a maysa a tagtagainep dagiti napalabasta. Nasam-it ngem apagkirem a napalabas.

Saannak koma a katawaan wenno ilunod kadaytoy a pangngeddengko. Manen, pangngaasim. Maawatannak koma…

Ketdi, mangnamnamaak a maunasto amin dagiti aliaw iti panunotko iti kabiitan a panawen…

-Joelyn

Dimmagsen ti riknak. Nalagipko ti kapadasan ni atanud Terio. No ipudnok iti chatroom-mi a napasamak met kaniak ti istoriana, mamatida ngata? Ket iti pay maysa a mannursuro a kas kaniak?

Anian, anian, a nagsutil ti gasat no maminsan…

No kaano a makarekoberak, panawen laengen ti makaibaga. Sabagay, adda pay laeng maripripiripko a lawag iti dayta maudi a binatog ti mensahe ni Joelyn.

Ania pay ngarud, life must go on a kunada. Nagadu nga ubbing ti agur-uray iti inaldaw a panagisurok. Diak kayat a mairamanda. Uray pay ibaga nga adu ti buong ti ulo kadakuada, isu ket isuda latta ti bugas ti kinamannursurok.