Footer

Sisterhood agreement, agpinnirma ti I. Sur ken Hunan province ti China

VIGAN CITY – Tapno nasingsinged pay ti relasion iti nagbaetan ti China ken ti probinsia, agbalin a  sister province ti Ilocos Sur ti Hunan province of People's Republic of China, daytoy ti impakaammo ni Gov. Deogracias Victor “DV” Savellano itay lawasna.

Kinuna ti gobernador a napabileg ti relasion iti nagbaetan dagiti dua probinsia babaen ti panagpinnirmada ken ni Governor Zhou Qiang ti Hunan province iti Letter of Intent for State Relationship sadiay Changsha, Hunan  idi Setiembre 26 iti daytoy a tawen.

Kinuna ni Savellano a babaen ti nasao a bilateral trade, mapapigsa ti industria ti agrikultura ken turismo ti  gobierno ti Ilocos Sur ken Hunan.

Masarakan iti akintengnga a paset ti People's Republic of China, addaan ti Hunan iti 21,800 square meters a land area ken 67.32 milion a populasion. Maaw-awagan ti Hunan kas "fish pond and rice bowl" ti PRC.

Turismo ken agrikultura ti pamastrekan ti probinsia ti Ilocos Sur ken kangrunaan a  tobacco producing province iti Kailokuan.

Kinuna ti gobernador nga agtinnulong ti probinsia ti Ilocos Sur ken Hunan para iti panakaipangpangruna ti pannakapadur-as iti ekonomia, agrikultura, edukasion, turismo, negosio ken siensia ken teknolohia para iti agpadpada a pagsayaatan dagiti dua a probinsia.

Kinuna ni Savellano a maysa a pagsayaatan ti sisterhood agreement ti pannakapadur-as ti industria ti tabako idinto a dinakamatna nga  adda kompania ti panagpartuat iti sigarilio ti  Hunan ket planona ti mangipatakder iti cigarette manufacturing plant ditoy probinsia  gapu ta agparpartuat ti Ilocos Sur iti napintas ti kalidadna a tabako.

Innayon pay ti gobernador a naipaiman iti Central Committee ti People's Republic of China ti Letter of Intent para iti pannakaaprobarna.#