Footer

Duog a balbalay iti Vigan City: sibibiag a testamento ti napalabas

Sinurat da Salvador A. Espejo ken Jaime M. Agpalo, Jr.

 

Nagdaras ti aldaw, ania? Setiembre manen. Kasla idi kalman laeng. Ita, ‘ber’ months manen! Lumam-ek metten ti parbangon. ‘Brrr…’!

Ngem ditoy Vigan City, ti kusikuti itoy a Setiembre ket maipapan iti World Heritage Cities Solidarity Day. Mangrugi ti selebrasion iti petsa 4.

Saan laeng a ti Vigan ti mangselebrar iti World Heritage Cities Solidarity Day no di ket internasional a selebrasion nga angayen dagiti nasurok dua gasut a world heritage cities. Maang-angay ti internasional a selebrasion iti Setiembre 8.

Buklen dagiti naisangsangayan nga ili ken siudad iti Africa, Arab States, Asia and the Pacific, Europe and Canada ken ti Latin America and the Carribean ti World Heritage cities.

Ti Vigan City ti kakaisuna a siudad iti pagilian manipud iti Asia ken Pacific region a kameng ti Organization of the World Heritage Cities (OWHC).

Naawagan daytoy a grupo a World Heritage Cities gapu iti pannakapreserba ti kaadaanan a kultura, dagiti istruktura ken pasdek a pakakitaan ti panagbiag kadagiti naglabas a siglo nga adda pay la ita a nawaya a maimatangan ken masaksian. Napreserba dagitoy a lugar a saan laeng a pangtaldiapan iti napalabas a panawen no di ket pakaekperiensaan a mismo iti kabibiag ken panagbiag iti napalabas.

Nabuangay idi Setiembre 8, 1993 ti Organization of the World Heritage Cities (OWHC) sadiay Fez, Morocco nga isu metten ti nakaadawan ti nainlubongan  a selebrasion. Ipangpangruna ti OWHC  kadagiti amin a kameng ti pannakapreserba ti world heritage—ti naisangsangayan a tawid—tawid sangalubongan.

Nagasat ti Vigan City ta naaddaan kadagiti agtuturay a mangilala ken mangipatpateg iti kinabaknang daytoy a siudad, saan laeng iti kultura no di pay iti kadakkel ti pasetna iti pakasaritaan ti pagilian. Kas maikatlo a kaduogan a lugar iti pagilian – simmaruno iti Cebu ken Manila – a simmangladan dagiti Espaniol, ti Vigan City ti sibibiag a pammaneknek ti kinabaknang ti kultura ken kannawidan dagiti Ilokano, ken iti pakabuklanna, dagiti Filipino.

Iti babaen ti administrasion ni Vigan City Mayor Eva Marie S. Medina, saan laeng a nasalimetmetan ken nasalakniban dagiti duog a balay a bato iti Heritage Village no di pay natarimaan ken napasublida iti punganay a kita ken arkitekturada. Babaen ti panangrienda ti kakaisuna a babai a nangidaulo iti Vigan City, manipud iti maysa nga ordinario a munisipalidad, naglupos daytoy a maysa kadagiti naprogreso a siudad ken nalatak a destinasion dagiti turista iti Amianan a Luzon.

Pammaneknek ti pannakaital-o ti Vigan City a maysa kadagiti maipagpannakkel a tawid ti sangalubongan ti pannakairamanna kadagiti mapagpilian a kas New7WonderCities.

Ipampannakkel ken idaydayaw dagiti Bigueños daytoy a tawidda a mangipakita iti kabibiag ti kaputotanda idi panawen ti Kastila a kas ipaneknek dagiti kadaanan a balbalay iti Heritage Village. Agserbi dagitoy a kas ruangan a serkan nga agturong iti napalabas a kabibiag—lalo idi panawen ti Kastila, ken ti pannakailaksid ti ili iti nakaam-ames a Maikadua a Gubat Sangalubongan.

Ti Vigan ti kapintasan ken kasasayaatan a pakakitaan iti kabibiag idi panawen iti Kastila. Dagiti kadaanan a balbalay iti Heritage Village ti natibong a timek a mangisarita iti kabibiag dagiti umili kadagiti napalpalabas a siglo.

Sipapannakkel ti Vigan ta naaddaan itoy a selebrasion a pangipakitaanna kadagiti saan a magatadan a tawid ken kulturana. Saan laeng a dagiti Bigueños ti maidayaw no di ket amin nga Ilokano.

Ti World Heritage Cities Solidarity Day ita a tawen ket naisangsangayan saan laeng a ti Vigan no di ket iti sibubukel a probinsia ta maaddaan manen iti gundaway a mangitandudo iti turismo.

Naisangsangayan ken naidumduma ti selebrasion ita a tawen ta atendaran dagiti siam a pulo ket innem nga ili ken probinsia iti Northern Luzon. Karaman dagiti umay makipagrambak dagiti nadumaduma a probinsia, ili ken siudad iti Cagayan Valley ken Cordillera.

Maysa kadagiti naisangsangayan a paset ti selebrasion ti World Heritage Cities Solidarity Day 2012 iti Vigan ti pannakaangay ti trade fair a mangrugi iti Setiembre 4.

Libre ti nasao a trade fair a pangiparangan dagiti partisipante nga exhibitors kadagiti produktoda a pakaanninagan metten ti kultura, aramid ken partuat ken kabibiag ti lugar. Agserbi ti trade fair a kas saranay ken suporta ti Vigan kadagiti dadduma pay a probinsia iti Region I, II ken iti Cordillera Administrative Region a mangipakita iti kinapintas dagiti produktoda.#