Skipper ti Philippine cycling team, kampeon iti Manila-Baguio Tour

BAGUIO CITY – Ti  dati a captain ti Philippine team a nangiyawid iti balitok a medalia iti napalabas a tour of Thailand ti kampeon iti lumba ti bisikleta  manipud Manila agingga iti daytoy a siudad.

Iti panangiyalat ni Irish Villanueva, 21, ti kampeonato iti Liquigas race to the Lion’s Head, ti 247-km Manila-Baguio a lumba ti bisikleta, pinedalanna iti innem nga oras, 47 a minutos ken 57 a segundos ti distansia a nangrugi sadiay Quezon City Memorial Circle ken naggibus iti Burnham Park ditoy itay Mayo 5.

Ti met la team ni Villanueva a binukel ti walo a siklista ti nagkampeon para iti team standing.

Imbulsa ni Villanueva ti P10,000.00 cash prize ken  P5,000.00 kas king of the mountains. Inyawid ti bunggoyna ti P75,000.00 kas overall team champion.

Inyalat met ni Joseph Millanes ti P5,000 premio kas sprint king.

Iti pannakasuspende ti Padyak Pinoy itoy a tawen, inisponsoran ti LPG Marketers Association ken ti Philippine National Association Cycling daytoy maysa nga aldaw a karera. Agdagup iti 96 dagiti siklista a naglulumba. 

Ni Villanueva ti rookie of the year iti Padyak Pinoy 2006.  

Segun kadagiti kameng ti komite ti lumba, dakkel ti tiansa ni Villanueva a mangabak iti daytoy a karera agsipud ta malaksid a kaub-ubinganna, dakkel pay ti padasna iti ballasiw-taaw a kas captain ti Philippine Team a nangiyawid iti balitok a medalia iti tour of Thailand. Maikapat ti nagun-od a puesto ni Villanueva iti cycling competition iti napalabas a Southeast Asian Games.

Maika-20 laeng a puesto ti nagun-od ni Victor Espiritu, kampeon ti Padyak Pinoy idi napan a tawen idinto a di nakastrek iti top 20 dagiti nagkamkampeon a kas kada Santy Barnachea, Warren Davadilla ken Arnel Quirimit.

Dagiti dadduma pay a nangabak: Renier Clauna, 2nd; Joel Calderon, 3rd; Dante Cagas, 4th; Tomas Martinez, 5th: Joseph Millanes,  6th; Renato Sambrano, 7th;  Edward Nardo, 8th; Ericson Obosa, 9th; ken Merculio Ramos, 10th.

Ti Tarlac City team ti nangiyalat iti maikadua a gunggona iti team standing idinto a maikatlo ti Team 11.

Ni Mayor Sonny Belmonte  ti namalubos kadagiti siklista iti Quezon City Memorial Circle idinto a ni Vice Mayor Daniel Fariñas ti namasangbay kadakuada iti Burham Park ditoy ken nangiyawat kadagiti premio. (Jim Agpalo)