Slogan ti Ilocos Sur, naaprobaran

VIGAN CITY – Inaprobaran ti sangguniang panlalawigan ti slogan  nga aramaten ti Ilocos Sur iti panangidur-asna iti turismo ditoy.

Naaprobaran ti “Sure Ilocos Sur” a kas slogan ti probinsia bayat ti session ti hunta probinsial a naangay idi Hulio 30.

Kanaig daytoy, kinuna ni Michael Chan, provincial tourism officer, a maragsakan iti pannakaaprobar ti singasingna nga indatagna iti committee on tourism nga idauluan ni Bokal Edgar Yabes.

Kinuna ni Chan a kas ibatbatad ti slogan, “sure” ti safety dagiti turista no addada iti probinsia, “sure” ti pannakapnekda nga agpasiar, “sure” a naragsak ti abenturada ken “sure” nga agsublida ditoy probinsia.

Karaman a naaprobaran iti sangguniang panlalawigan ti logo ti turismo ti probinsia.#