Snatcher, pinakawan ti biktimana

VIGAN CITY – Agsansaning-i manen ti kapolisan ditoy ta nakalusot manen ti maysa nga snatcher kalpasan nga imbatad ti biktimana a saanen nga interesado nga agdarum pay.

Iti sabali a bangir, mangigis la ketdi iti isem ni Elking Estayo y Pante, 24, baro, ken residente iti Barangay Bulag Centro, Bantay, Ilocos Sur, agsipud ta nalusotanna ti posible a panagkakasona gapu ta saanen nga agdarum pay ni Tristan Jeronimo Taal y Viloria, 16, awanan asawa, ken residente iti Barangay Sta. Monica, Magsingal, Ilocos Sur.

Maipalagip nga idi agarup 9:15 ti rabii ti Nobiembre 23, bayat ti kaadda ni Taal iti Quirino Boulevard, Barangay Tamag, Vigan City, ginammatan ken intaray ni Estayo ken maysa a di nainaganan a kaduana.

Ngem kalpasan a narekobre ni Taal ti Samsung Galaxy Tab nga inisnats ni Estayo, nagpirma iti apidabit a saanen nga interesado nga agipila iti kaso.

Maysa kadagiti saksakiten ti nakem ti kapolisan ditoy ti saanen a panagdarum dagiti biktima no napasublidan ti natakaw kadakuada.#