Soft opening ti baro a legislative building, naisingasing

VIGAN CITY – Tarigagay dagiti sumagmamano nga agturpos a konsehal ditoy siudad a makapagtugawda uray apagbiit iti kaipatpatakder a legislative building ditoy siudad sakbay ti ibababada iti puestoda.

Kinuna ni Konsehal Loreto Quibilan a kalikagumna ti panagtugawda nga agturposen ti terminoda a konsehal iti uray apagbiit laeng iti kabarbaro a legislative building.

Kaanonto ti pannakabaddekmi iti uneg dayta a pagtaengan ti konseho…?” sinaludsod pay ni Quibilan.

Insingasing met ni Konsehal Hermenigildo Apelin ti pannakaaramid ti soft opening ti nasao a pasdek sakbay ti panagultimo ti serbisioda ken ti pannakaikabil ti maysa a marker a pakailanadan ti nagan dagiti kameng ti sangguniang panlungsod a pakairamanan ni Governor-Elect Ryan Singson nga isu ti bise mayor idi naigannuat ti pannakaipatakder ti baro a legislative building.

Kinuna ni Vice Mayor Lourdes Baquiran nga inton malpas ti nasao a pasdek, nawayanto latta dagiti agturpos a konsehal a bumisita iti pagsessionan.

Dua laengen a lawas ket bumabanton iti puesto da Quibilan, Apelin, ken Konsehal Henry Formoso ken Konsehal Audie Agdamag agsipud ta maungpotdan ti tallo a nagsasaganad a terminoda a kas konsehal.#