Solar lamps, nakiddaw

CABUGAO, Ilocos Sur – Nangipasa ti sangguniang bayan ditoy iti maysa a resolusion a mangkiddaw ken ni Congressman Ryan Luis Singson kadagiti solar lamps a maipasdek kadagiti sumagmamano a coastal barangays ditoy nga ili.

Kinuna ni Konsehal Benedict Savellano, nakiddaw dagiti solar lamps ken ni Diputado Singson a maipasdek kadagiti coastal barangays nangruna dagiti destinasion dagiti turista a pakaibilangan ti Barangay Sabang, Dardarat, Salomague ken Pug-os.

Maysa dagiti solar lamps ti itantandudo ti diputado a maipasdek kadagiti coastal barangays agsipud ta  environment-friendly daytoy a teknolohia.

Itay nabiit, kas paset ti pannakatagiben ti aglawlaw, indauluan ni Singson ti panagmula iti mangrove iti Barangay Teppeng, maysa a coastal barangay iti Sinait, Ilocos Sur.#