Footer

Soldado, nakaatal gapu iti bulos nga aso

BANAYOYO, Ilocos Sur – Gapu iti bimmallasiw nga aso, naatalan ti maysa a soldado ti maysa nga ubing ken nakadundunoranna met sadiay Barangay Elefante, ditoy nga ili idi bigat ti Hunio 26.

Nagsagrap ni PFC James Christian Caoile Martin, 24, residente iti Barangay Apanay, Alicia, Isabela ken miembro iti Philippine Army a naidestino iti 7th ID base, Lidlidda, Ilocos Sur iti dunor iti nadumaduma a paset ti bagina gapu iti pannakatulid ti luganna kalpasan a naatalanna ni Kurt Jones Valentin y Libagdao, 10, residente iti Barangay Alfonso, Gregorio del Pilar.

Naitaray dagiti dua iti Candon General Hospital babaen kadagiti nagresponde a polis.

Kas maibatay iti panagimbestiga dagiti polis, agpaili ti Banayoyo ni Caoile ket idi makadanon iti rangtay iti sango ti balay ti maysa nga Owen Galang, bimmallasiw ti maysa a bulos nga aso a nakagapu ti pannakapukaw ti biktima iti kontrolna iti manibela a puon ti nakaatalanna ken ni Valentin.#