Footer

SP tinakderanna resolusion a mangadaptar iti maysa a negosiante nga anak ti I. Sur

VIGAN CITY – Tinakderan dagiti kameng ti sangguniang panlalawigan ti impasada a resolusion a mangadaptar iti maysa a dakkel a negosiante a kas anak ti probinsia ti Ilocos Sur iti sanguanan ti panangprotesta ti maysa a dati nga empleado daytoy.

Iti interbiona iti radio, kinuna ni Bise Gobernador Jerry Singson a tinakderan ti sangguniang panlalawigan ti resolusion a mangadaptar ken ni Lucio Tan nga anak ti Ilocos Sur.

Kinunana a napirmaanen ti nasao a resolusion idi rummuar ti kinaklaseanna a ni Elpidio “Boy” Que a nangkuestionar iti daytoy.

Dimmatag ni Que iti hunta probinsial  idi Hulio 30 tapno kiddawenna nga ibabawi ti Sangguniang Panlalawigan ti resolusion nga impasana,  agduan a bulan ti napalabas, a mangadaptar ken ni Tan kas anak ti Ilocos Sur.

Kinuna ni Bokal Gerry Lahoz a maysa a wagas ti panangay-ayo ti panangipasada iti resolusion a mangadaptar ken ni Lucio Tan kas anak ti Ilocos Sur tapno maaddaan iti investor-friendly nga imahe ti probinsia .

Kinuna ti bokal a dakkel a pakaguyugoyan ni Tan ti nasao a resolusion tapno ad-adu pay ti ibautna a negosio iti probinsia.

Iti panagsarita ni Que iti naangay a public hearing iti SP Hall, minaysamaysana dagiti mapapati a  naglabsingan ni Tan iti karbengan dagiti obrero ti kompaniana.

“Pilien koma met dagiti opisialestayo dagiti personalidad nga adaptarenda kas anak ti Ilocos Sur. Dagitay koma awanan iti pakasarsaritaan a kas ken ni Lucio Tan. Laglagipentayo a ti pannakaadaptar ti maysa a tao nga anak ket maysa a pribilihio, saan ket a karbengan,” kinuna ni Que.

Taga-Vigan ni Que ket nagpaay iti kompania ni Tan kas regional sales manager manipud 1997-2005 ngem mapapati nga illegal a nadismis iti trabahona.

Ngem kinuna ni Lahoz  a “mas nasaysayaat a pagpapatangan iti korte dagiti  imbaga ni Apo Que” idinto nga indagadagna a “saantayo koma nga usaren ti hunta probinsial a pagipeksaan iti personal a guratayo amangan no imbes a maay-ayo dagiti negosiante, agbalin a harassment kadakuada no ibabawi ti SP ti nalpasen a naaprobaran a resolusion.”

Pinaglibakan ni Que ti alegasion nga adda personal nga interesna iti panangkontestarna iti resolusion idinto nga impettengna nga iggemna dagiti pammaneknek dagiti naglabsingan ni Tan aglalo iti kalintegan dagiti trabahadorna.

“Obligasionko kas maysa a pudpudno nga anak ti Ilocos Sur ti mangibutaktak iti ammok a no saan a maaluadan, pakadadaelan ti probinsia. Saanak a mamati a kasapulan nga ay-aywen ti maysa a negosiante kas ken ni Lucio Tan nga addaan iti saan nga husto nga aramid,” kinuna ni Que.

Ngem kinuna ni Bokal Ronie Rapanut a naladaw unayen ti idadatag ni Que ta nalpasen a naaprobaran ti resolusion.

“Rumbeng koma a naiwaragawag ti objection idi madama pay laeng ti deliberasion ti resolusion. Takderak ti panangkanunongko iti resolusion ta diak kayat nga ibagada nga agbaliwbaliw ti desisionko,” kinuna pay ni Rapanut.#