Footer

Space Science roadshow, naangay

VIGAN CITY – Naangay ti maysa nga space science roadshow iti Plaza Burgos ditoy siudad itay Marso 2-4.

Nagkinnamayetan nga inrusat ti gobierno ti siudad ti Vigan, Department of Science and Technology ken ti Department of Education, mapattapatta a nasurok a 2,000 nga estudiante manipud iti nadumaduma a pagadalan iti sekundaria ken elementaria ditoy siudad ti dimmar-ay iti panaglukat daytoy.

Kinuna ni Mayor Eva Marie S. Medina a naangay ti space science roadshow tapno makatulong kadagiti estudiante iti panagadalda iti siensia.

Malaksid iti digital planetarium, naipabuya pay kadagiti estudiante ti video films manipud iti National Aeronautics and Scientific Administration a pakairaman dagiti panagbaniaga dagiti astronauts iti law-ang.#