Special job fair para iti La Union, naangay

San Fernando CITY, La Union – Kas kadagiti napalpalabas a tawen, adda manen naangay nga Special Job Fair iti Saint Louis College gymnasium para kadagiti umili iti La Union ken dagiti kabangibang a probinsia kas paset iti pannakarambak ti maika-68 a panagkasangay ni Gobernador Manuel C. Ortega idi Agosto 2.

Daytoy a gannuat ket nagtitinnulongan nga insayangkat ti gobierno probinsial iti La Union, employers, Philippine Overseas Employment Administration ken Department of Labor and Employment  (DOLE) a nagkakayammet tapno maangay ti Special Job Fair.

Impakaammmo ni DOLE 1 Regional Director Grace Ursua nga adda agarup 30 a local employers ken 30 a lisensiado a recruitment agencies a nakigamulo iti nasao a job fair a nangipaay kadagiti aplikante iti gundaway a makapagtrabaho iti lokal ken ballasiw-taaw .

Nakuna ni Ursua a babaen ti special job fair, naikkan dagiti aplikante iti gundaway a makapagtrabaho a makissayan ti bannog ken rigatda nga agbirok iti trabaho ta mismo a one-stop-shop dagitoyen.

“Nagutigot dagiti agbirbirok iti trabaho nga alaenda daytoy a gundaway tapno maaddaanda iti trabaho,” nakuna ni Ursua sana innayon nga adda dagiiti nagasat a naala iti mismo nga aldaw iti job fair.

Kabayatanna, binallakadan ni Labor Chief Rosalinda Dimapilis-Baldoz dagiti aplikante a “dida koma a biroken dagiti trabaho a nangato iti sueldona, aguantaanda koma dagiti bakante a makaited kadakuada iti pannakasanay tapno mapasayaat pay dagiti ammoda.”

Inyunay-unay ti regional director a ti DOLE ken LGUs (local government units) babaen iti Public Employment Service Offices (PESOs) ket agtultuloy a mangpapigsa iti koordinasionda tapno maakem ti agdama nga administrasion daytoy pannakapaadda iti disente nga adienda iti panagtrabaho babaen iti pannakabuangay dagiti job fairs.

Sakbayna, naballakadan dagiti aplikante nga agkawesda a nasayaat, datay makuna a corporate attire ken mangi-tugotda iti adu nga application letters nga adda resumena, official transcript of records, employment and training certificates, diploma, 2″ x 2″ pictures ken dadduma a pammaneknek iti adda a kabaelanda. (Errol L. Abrew)