Footer

SSS personnel bumisita kadagiti business establishments iti Ilocos Sur

VIGAN CITY – Mangisaysayangkat dagiti personnel ti Social Security System ti panagbisita ken inspeksion kadagiti business establishments ken pagtrabahuan iti Ilocos Sur tapno maduktalan dagiti employer a saan a nangikappeng kadagiti empleado wenno trabahadorda, ket dagiti maduktalan ket makasuan iti panaglabsing iti linteg a mabalin a pakadusaanda iti panagmulta wenno pannakabalud.

Dayta ti imballaag ni Mr. Richard Raralio, SSS Vigan Branch Manager, iti pannakiuman kenkuana dagiti kameng ti media iti naangay a Dap-ayan Ilocos Sur Media Forum.

Inlawlawag ni Mr. Raralio nga adda visitation team a mangisaysayangkat iti inspection kadagiti establisimiento ti negosio kadagiti dadakkel nga ili ken siudad iti Ilocos Sur tapno takuatenda dagiti kompania wenno negosio a saan nga aglablabsing iti linteg ken manggungundaway kadagiti trabahadorda. Impakaammona a mayataday iti Labor law, nasken a ti employer ket imiembrona iti SSS ti trabahador wenno empleadona no innem a bulanen nga agtatrabaho iti kompania wenno establisimiento.

Impakaammona nga adda dagiti maaw-awatda a report iti panaglabsing dagiti employer iti linteg, ngem saanda a naan-anay a magabenan gapu ti kabassit dagiti personnel ti SSS iti Vigan Branch, ngem in-inutenda a bisbisitaen dagiti kompania tapno maduktalan dagiti aglablabsing nga employer. Nagballaag pay kadagiti employer a bayadanda iti umno a panawen dagiti kontribusionda ken ti empleadoda iti SSS tapno adda dakes a mapasamak kadakuada ket adda benepisio a magun-odda.

Inlawlawagna pay ti pakabuklan ti Kasambahay Law a mangimanmandar kadagiti employer ti panangimiembroda iti SSS kadagiti katulongda. Inaklonna nga adu pay laeng dagiti employer dagiti saan a mangiyen-enrol kadagiti katulongda iti SSS gapu iti kinarikut dagiti kasapulan iti panagbayadan iti kontribusion. Pinagyamananna ti singasing a no mabalin a volunteer member laengen ti pakaibilangan dagiti katulong tapno nadardaras ti proseso ti panagbayadda iti kontribusion. Impasingkedna ti panangidatagna ti singasing iti komperensia dagiti opisial ti SSS tapno nalaklaka ti panagmiembro dagiti katulong.

Inlawlawagna a ti baro nga automated system iti panagbayadan ken dadduma pay a transaksion iti SSS, ket padarasenna ti operasion ta mabalinen dagiti miembro ti makitransaksion iti online computer imbes a mapanda kadagiti opisina. Imbinsabinsana dagiti banko a mabalinen a pagbayadan iti kontribusion, ngem kasapulan a mangala pay iti Payment Information Number iti online wenno iti opisina ti SSS.

Inawisna pay dagiti amin nga indibidual a nababbaba ngem 60 ti tawenda uray no awan ti pagtrabahuanda a mabalinda ti agmiembro iti SSS kas volunteer members tapno nataltalgedto ti maasakbayan. Inallukoyna pay dagiti Overseas Filipino Workers nga agenrol kas SSS kas OFW member para iti seguridadda iti masakbayan. Impalagipna pay dagiti nagduduma a benepisio a magun-od dagiti miembro ti SSS ken dagiti dependent-da kas ti sickness, maternity, retirement, disability, death and funeral benefits.  (Eden Alviar)

,