St. John The Baptist Minor Basilica iti Badoc, baro a pilgrimage destination iti Kailokuan

NAINDAKLAN a grasia ti Dios kadagiti Ilokano a Katoliko nangruna dagiti agindeg iti Amianan a Luzon ti panangital-o ni Papa Francisco kas Minor Basilica ti daan a simbaan ti Parokia ni San Juan Bautista iti ili ti Badoc, Ilocos Norte.

Napnuan-kaipapanan para kadagiti Katoliko a mamati nangruna kadagiti pilgrims ken deboto ni Santa Maria ti panagbalinen ti simbaan iti parokia iti Badoc kas Minor Basilica ta saandan a nasken a mapan agkararag kadagiti adayo a basilica para ti pannakagun-odda iti grasia ti plenaria indulgensia wenno pannakapakawan dagiti basolda ta addan asideg a papananda.

Napateg iti Kailokuan nangruna iti Ilocos Norte ken Ilocos Sur para iti panagdur-as ti Pammati, turismo ken komersio ti kaaddan ti baro a basilica iti Badoc ta nanayonan pay dagiti adun a pilgrimage destinations ken tourist attractions a mangital-o kadagiti nagduduma a negosio. 

Nadaras ti proseso ti pannakaiproklamar ti baro a minor basilica ti Iglesia Katolika iti Pilipinas ta agsiam a bulan pay laeng kalpasan ti Canonical Coronation ti imahe ni La Virgen Milagrosa de Badoc idi Marso 31, 2018 babaen ti pannakabagi ni Santo Papa, ni Manila Archbishop Cardinal Luis Antonio Tagle, ken Cotabato Archbishop Cardinal Orlando Quevedo, Ilokano a tubo ti Ilocos Norte.  Napartak ti panagdur-as ti simbaan iti Badoc babaen ti panagtimpuyog ti Simbaan ken gobierno – ti Diosesis ti Laoag iti panangidaulo ni Bishop Renato Mayugba, ken ti Provincial Government ti Ilocos Norte iti liderato ni Governor Imee Marcos.

Idi Pebrero 5, 2019, pormal nga improklamar ni Papal Nuncio Giordano Caccia ti simbaan iti Badoc kas minor basilica iti Pilipinas kabayatan ti Nasantuan a Misa nga indauluan ni Davao Archbishop Romulo Valles, Presidente ti Catholic Bishops’ Conference of the Philippines. Nakipagrambak iti Misa da Cardinal Quevedo, Osaka (Japan) Archbishop Cardinal Thomas Aquinas Manyo Maeda, Nueva Segovia Archbishop Marlo Peralta, ken adu nga obispo, papadi, relihiosa ken laygo pakairamanan dagiti adu nga opisial ti gobierno nga indauluan ni Ilocos Norte Vice Governor Angelo Marcos Barba. Saan a nakaanay ti simbaan ti kaadu dagiti nakimisa a nangsaksi iti dayta a napanuan-kaipapanan a paset ti pakasaritaan iti Ilocos Norte, ken iti Amianan a Luzon.

Iti nabagas a homilia ni Cardinal Quevedo, impakaammona ti kinapateg dagiti basilica kas balay-pagkararagan a pakagun-odan iti pannakapakawan ti basol. Sinalaysayna nga adda laeng uppat a major basilica ti Iglesia Katolika, ken agpapadada nga adda sadiay Roma, Italia – St. Peter Basilica, St. Paul Basilica, Sta. Maria Maggiore Basilica ken St. John Basilica. Impakaammona nga adda nasurok a 2,000 a minor basilica iti intero a lubong, ken 14 iti intero a Pilipinas, kaudianna iti Badoc. Inlawlawagna nga iti panagbalinen ti simbaan iti Badoc a minor basilica, ket maipadan kadagiti nalatak a simbaan kas ti Manila Cathedral, Sto. Niño Shrine sadiay Cebu City ken kadagiti simbaan iti Piat (Cagayan), Manaoag (Pangasinan), Peñafrancia (Naga City) ken dadduma pay a minor basilica iti pagilian.

Impalagip ni Cardinal Quevedo ti pakasaritaan ti imahe da Santo Cristo Milagroso ken La Virgen Milagrosa a naikabil iti kahon a naalaw dagiti mangngalap iti Badoc ken Sinait, Ilocos Sur iti igid ti kabaybayan ti Brgy. Logo (Sinait) idi 1620 a naipayanud manipud Japan. Inlawlawagna a dagiti imahe da Santo Cristo Milagroso ken La Virgen Milagrosa ket impayanud dagiti Katoliko iti Japan tapno saanda a madadael ta kadagita a panawen ti Tokugawa Shogunate ket kangitingit ti pannakaitugtuggod ken pannakaidadanes dagiti Kristiano. Kinagura dagiti agturay iti Japan dagiti Kristiano ta nagamakda a napatpateg ni Kristo a Dios, ngem iti Shogun. 

Sinalaysayna a pinaanup dagiti agturay iti Japan dagiti Kristiano, ken pinapatayda dagiti saan a nangtallikud ti pammatida, mairaman kadagiti martir ket da San Lorenzo Ruiz, ti umuna a santo a Pilipino, ken ni Justus Takayama Ukon, ti Hapon a “Christian Samurai Warrior. Impaganetget a ni Ukon ket maibilang a “noble man” iti Shogunate, ngem tinallikudanna ti nangato a saadna iti panangabrasana ti Kristianismo, ket kaduana dagiti nasurok a 300 a Katoliko a nagpaing iti Manila, a nakatayanna idi 1615.

Inlawlawag ni Cardinal Quevedo nga iti las-ud ti 250 a tawen ket naidadanes ken naglemlemmeng dagiti Kristiano sadiay Japan; ket impagarup dagiti agturay a naungawdan, ngem nagtalinaed a natibker ti pammatida ken Kristo, agingga a naibutaktak iti lubong idi maika-18 a siglo ti kaadda dagiti adu a “hidden Christians of Japan,” ket napalubosandan nga agdaydayaw iti Dios.

Impakaammona nga idi Marso 2015 ket pinili ni Papa Francisco a pannakabagina iti pannakarambak ti “150th  Anniversary of Commemoration of the Discovery of Hidden Christian of Japan” sadiay Nagasaki a nagsarakanda ken ni Cardinal Maeda ti Osaka a nagtaud ti kapuonanna kadagiti naidaddadanes ken naglemlemmeng a Kristiano iti Japan. Impasagepsepna nga iti dayta a pasken ket lagipen ken rambakan dagiti mamati ti pannakaalaw ti imahen ni La Virgen Milagrosa ken Santo Cristo Milagroso, ti pannakatay ni Justus Takayama Ukon, ti pannakadiskobre dagiti aglemlemmeng a Kristiano iti Japan, ken ti ayat ni Kristo ken Santa Maria kadagiti annakna.                         

Iti dayta met laeng nga aldaw, binendisiran da Bishop Mayugba ken Cardinal Maeda dagiti imahe da San Lorenzo Ruiz, ken Justus Takayama Ukon, ken naisaadda iti agsumbangir nga igid ti altar ti Minor Basilica. Pormal met a naisaad ni Rev. Fr.Frederick Victorio Astudillo kas umuna a Rector ti Minor Basilica.

Naragsakan dagiti adu a Katoliko iti Kailokuan nangruna dagiti agindeg iti Ilocos Norte ken Ilocos Sur iti kaaddan ti minor basilica iti Badoc ta ipaneknek dayta ti panagdur-as ti Katoliko pammati dagiti Ilokano a maibilang a naindaklan nga impatawid dagiti Kastila nga Agustino a misionero a nangisangpet ti Kristianismo iti pagilian. Nairanrana a napasamak ti proklamasion ti minor basilica iti panawen a maramrambakan iti maika-201 a tawen ti panagwaywayas a probinsia ti Ilocos Norte ken Ilocos Sur a sigud a maymaysa a probinsia ti Ylocos a nagsina idi Pebrero 2, 1818. Naaddaan iti minor basilica iti Badoc, dua a tawen sakbay ti panangrambak dagiti Pilipino ti maika-500 nga anibersario ti Kristianismo iti Pilipinas manipud idi Marso 1521 idi isangpet dagiti Kastila ti pammati a Katolisismo iti Pilipinas.  ●