State of the art sports complex, nainaguraran

BANTAY, Ilocos Sur – Naangay ti umuna a football game iti nagbaetan ti Ilocos Sur team ken Region 1 Athletic Association team iti world class football field kas paset ti pormal a pannakainagurar ti kabarbaro nga sports complex ditoy idi Mayo 1.

Mismo a da Governor Ryan Singson ken Dr. Rubio Torio ti nangipaay iti ceremonial kick iti panangrugi ti ay-ayam iti imatang dagiti sports coordinators ken coaches ti RIAA kalpasan ti panangbendision ni Msngr. Gary Formoso ti napasayaat a Quirino Stadium a sinaksian dagiti opisial ti gobierno probinsial, Department of Education Regional Director Dr. Alma Ruby Torio ken dadduma pay a DepEd officials, Tourism Council nga indauluan ni Eddie Quirino, dagiti managayat iti sports ken pannakabagi dagiti nadumaduma a sektor iti probinsia.

Kinuna ni Governor Ryan Singson a babaen daytoy state-of-the-art sport facilities ti probinsia a pakasanayan dagiti atleta, manamnama ti pannakaangay iti Ilocos Sur ti Palarong Pambansa inton 2018.

Pormal met nga impakaammo ti gobierno probinsial ti pannakaangay ti RIAA ditoy probinsia inton 2017.

Segun ken ni Singson, ti napasayaat a Quirino Stadium ti maikatlo a world class sports complex a nabangon iti pagilian ket kabaruanan dagiti nainstolar a pasilidad a pakaibilangan ti basketball court, lawn tennis court, rubberized race track, ken ti world class football field.

Kinuna ti gobernador a nakalukat ti stadium kadagiti amin a lokal a club iti probinsia para iti pannakasanay dagiti atleta tapno ad-adda pay a mapatan-ayda ti kabaelanda.

Kabayatanna, kinuna ni Provincial Sports Coordinator Marius Cabudol a madaman ti pannakaipasdek ti beach volleyball court iti uneg met laeng ti stadium malaksid ti covered court para kadagiti indoor nga aktibidad kas iti badminton ken table tennis, kasta met ti maysa a boxing ring, swimming pool ken paggianan dagiti agsanay nga atleta.#