State of the Nation Address 2016

NAGDUDUMA ti reaksion dagiti Pilipino iti umuna nga State of the Nation Address ni Presidente Rodrigo Duterte. Adda dagiti mamati a nabagas ti SONA. Adda met dagiti agdudua a kasla met laeng dagiti immuna a SONA dagiti sinukatanna a presidente a napno kadagiti nasam-it a balikas ken nangato nga arapaap, ngem nagpatinggada laeng iti sarita.

Napaut a paset ti SONA ti Presidente ti kampania kontra illegal a droga, krimen ken kurapsion. Impaganetgetna ti saan a pannakausar ti human right a lapped ti pannakapaksiat ti kinadakes. Binilinna dagiti pulis ken dagiti maseknan nga ahensia ti gobierno ti napinget a panagtrabahoda. Minandarna dagiti military ti pannakaaramat dagiti kampo a pagyanan dagiti rehabilitation center dagiti drug addict.

Impalgakna pay ti pannakapatibker ti Reserve Officer Training Corps.  Binallaaganna ti Abu Sayyaf Group ti pannakausar ti puersa ti AFP tapno mapaksiatda. Kiniddawna ti pannakikaysa dagiti rebelde a Muslim ken komunista iti pannakagun-od ti kappia. Indeklararna ti pannakapasubli ti peace talk ken unilateral ceasefire iti nagbaetan ti gobierno ken  Communist Party of the Philippines, New People’s Army, ken National Democratic Front. Impalgakna ti panangsurotna iti desision ti Permanent Court of Arbitration ti pannakarisut ti susik iti West Philippine Sea.

Impakaammona ti pannakalukat ti Malacanang ken 8888 Hotline a pagipulongan ti kurapsion ken kinadakes; pannakapalukay ti bank secrecy law; pannakayusuat ti gannuat iti Federalismo; naan-anay a pannakayimplementar ti reproductive health law; ken pannakaipababa ti personal and corporate income tax. Nagkiddaw ti emergency power tapno nadaras a masolbar ti trapiko iti Metro Manila, ken pannakaaramid ti linteg tapno mabangon dagiti agaassideg nga opisina dagiti maseknan nga ahensia a kangrunaan kasapulan ti serbisio dagiti umili.

Impasingkedna ti pannakitimpuyogna iti pannakalapped ti global warming nga agbatay iti patas a pannakipaset ken saan a makalapped iti industrilisasion ti pagilian. Pinatalgedanna pay ti pannakasaluad ti nakaparsuaan kontra illegal logging ken irresponsible mining. Impalgakna ti pannakaikkat dagiti adu a bus terminal sadiay Metro Manila, pannakapainget ti kampania kontra kolurom, pannakapadur-as ti rail system. Impakaammona pay ti pannakapapartak ti internet connection babaen ti mabukel a baro a Department of Information and Communication. Impasingkedna ti sigud a pannakaited dagiti motor plate kadagiti pakatangan dagiti lugan. Indeklararna pay ti panagbalinen a lima a tawen ti panagpaso ti driver’s license a sigud a tallo a tawen. Impalgakna pay ti tarigagayna nga awan dagiti mapapanaw wenno maduprak a pagtaengan dagiti informal settler nga awan ti pakayakaranda.

Adu pay dagiti tarigagay ken plano a naipalaon iti 98 a minuto a SONA a naipakauna nga agpaut laeng iti 38 a minutos. Nagpaut daytoy gapu kadagiti atiddog a kellaat nga innayon ni Duterte iti naisagana a mensahena. Nasayaat ti saan a panagpabasol ni Presidente Duterte iti sinarunona nga administrasion kadagiti problema a sagsagabaen dagiti umili.

Nasimple ti SONA ta awanen dagiti pinnarammagan ti aruaten dagiti dimmar-ay, ken saan a nangina dagiti naidasar a merienda ta nakasalimetmet ti gobierno. Nakappia pay ta awan dagiti nagprotesta a grupo ngem napalubosanda a nakaasideg iti Batasang Pambansa a nangipakitaanda ti suportada iti Presidente.

Iti likudan dagiti positibo a pasamak ken tarigagay iti SONA, saan a maikkat ti panagdudua dagiti dadduma nga umili. Agduduadan gapu iti padasda kadagiti immun-una  a SONA dagiti Presidente a nagpatingga laeng iti sarita. Iti SONA 2016, nagkaykaysa ti kalikagum dagiti Pilipino nga ikagumaan koma ti Duterte Administration a gun-oden dagiti plano a nayetnag para ti pagimbagan ti pagilian. (Eden Alviar)