State of calamity iti Ilocos Sur gapu iti dengue, naakasen

VIGAN CITY – Inakkalen ti gobierno probinsial ti Ilocos Sur ti indeklarana nga state of calamity iti probinsia maigapu iti dengue idi Septiembre 14.

Nasapsapa iti maysa nga aldaw ti panangikkat ti gobierno probinsial iti state of calamity iti probinsia imbes nga iti Septiembre 15 nga immuna nga impakdaarna kalpasan a napatalgedan nga awanen ti peggad nga itden pay daytoy a sakit kadagiti agindeg iti probinsia.

Mismo a kiniddaw ni Provincial Health Officer Dr. Carmeliza Singson bayat ti session ti sangguniang panlalawigan ti pannakaakkal ti state of calamity iti probinsia a naideklara idi Agosto 1 gapu iti isusuyop ti bilang dagiti umili a nagsakit iti dengue.

Manipud idi Enero agingga idi maudi a lawas ti Agosto daytoy a tawen, immabut dagiti kaso ti dengue iti 2,871 ken nakatayan iti 14.

Kangrunaan a nasipsiputan ti siudad ti Vigan a kaadduan ti naireport a kaso ti dengue, simmaruno ti Sto. Domingo, Cabugao, Bantay, Sta. Lucia, ken ti Candon City, Santa, Sta. Cruz ken Caoayan gapu iti kellaat a yaadu dagiti nagsakit iti dengue kadagitoy a lugar.

Napagamkan pay ti yaadu manen dagiti kaso ti dengue idi dinuprak ni Bagyo Mina ti probinsia ngem saan a napasamak no di ket bimmassit ti bilang dagiti nagsakit iti dengue gapu kadagiti inwayat ti gobierno probinsial ken ti provincial health office nga addang tapno mapugipog daytoy a sakit.

Kinuna pay ni Singson nga iti pannakaakkal ti state of calamity gapu iti dengue, idagadagna kadagiti nakurapay nga agindeg iti probinsia ti panagalada iti Philhealth card a maaramatda no agsakitda ken maiserrekda iti ospital.

Libre ti nagasto iti ospital dagiti nagsakit iti dengue idi adda ti probinsia iti babaen ti state of calamity agsipud ta nausar ti gobierno probinsial ti calamity fund tapno matulongan dagiti biktima ti dengue.#