Statement of Assets and Liabilities and Networth ti nangpattog iti maysa a chief justice

Salaysay ni Rilo A. Bedo

(Maudi a paset)

 

Iti naunday a panagtaray ti kaso, naimatangantayo ti nasidap a binnato iti kapanunotan iti nagbaetan ti depensa ken prosekusion. Inaramid ti tunggal benneg ti amin a siribda tapno mangabakda laeng iti labanda.

Iti pannakawarwar ti kaso, nakitatayo a nagpinningki ditoy ti maipapan iti Akta Republika 6426 ken Akta Republika 6713. Inaramat ni Corona ti immun-una tapno depensaanna ti bagina. Daytoy ‘tay Foreign Currency Depositors Act wenno linteg nga agkunkuna a di kan’ masapul nga ideklara iti SALN ti dollar account ti maseknan. Ngem impilit ti prosekusion a masapul a maideklara dagitoy ta segun iti RA 6713 wenno Code of Ethical Conduct a nakabase iti Konstitusion, masapul nga ideklara ti asino man nga agtrabtrabaho iti gobierno ti/dagiti kinabaknangna manipud iti sanikua, kuarta nga adda kenkuana wenno iti man  bangko.

Ket iti pannakayulog ti desision, nalawag a nangabak ti RA 6713 nga isu met ti nangpadaleb ken ni Corona nupay kuna dagiti abogadona a di nga impeachable case ti di panangideklara iti dollar account, ken protektado pay ti RA 6426.

Palusot laeng kano ni Corona dagiti rasonna idi agtugaw daytoy iti witness stand, segun ken ni Rep. Rudy Fariñas ti Ilocos Norte.

Segun met ken ni natured a Sen. Mirriam Defensor-Santiago, saan met nga impeachable ti pannakalipat ti panangideklara iti maysa a kinabaknang iti SALN ta daytoy a banag ket saan a maipada kadagiti kaso a treason ken bribery (a bin-ig nga impeachable). Impettengna pay nga awan ti risiris iti nagbaetan ti dua a linteg iti ngato ta daytoy RA 6426 nabukel a mangprotektar kadagiti imbestor nga umay mangibaut iti kuartada iti negosio ditoy pagiliantayo. Ket no pudno nga adda intension ni Corona nga idulin dagiti dollar acoount-na, apay nga inusarna ti pudno a naganna? Mabalin met dita nga inaganna kadagiti kabagianna wenno mangusar iti sabali a nagan (pen name koma no mannurat). Kinaipokrito kano daytoy nga akusasion ken ni Corona.

Nagasang dagiti birada ni Santiago. Ngem nagimetda iti di mabalusingsing a kinapudno. Adu kan’ kadagiti politikotayo ti mangiruar kadagiti kinabaknangda iti banko kasakbayan ti Disiembre a panagipasa iti SALN. Tapno didanton ideklara daytoy iti SALN-da. Ngem apaman a sumrek ti Baro A Tawen, idepositodanto met laeng.

Ngem amin dagitoy a punto ni Santiago (a kaduana da Sen. Joker Arroyo ken Sen. Ferdinand Marcos, Jr.) a pabor ken ni Corona, naawanda iti bileg ta 20 a senador ti nangayon iti punto ti prosekusion.

Nagbalin ketdi a nakallalagip ti pannakadakamat ti kaso ti maysa a dati a court interpreter a naikkat iti puestona gapu laeng iti dina pannakaideklara ti bassit nga store-na iti SALN-na. Kaaduan kadagiti senador ti nagdesision a no naikkat daytoy nga empleado gapu laeng kadayta bassit a banag a mabalin a nalipatanna (wenno inrantana), di ad-addan a masapul a maikkat met ti Kangatuan nga Ukom ta million a doliar ken pisos ti patangan ditoy!

Saan laeng a pisos!

Adu ti mangibagbaga a naibase dagiti pangngeddeng dagiti senadortayo iti politika saan ketdi a kadagiti naipresenta nga ebidensia wenno ania ti kunkuna ti linteg. Adda pay nangaklon nga agdesision segun iti konsensiana. Iti linteg, subjective daytoy iti panangeddeng. Agbatay koma kano ti amin iti ebidensia ta objective daytoy nga isu ti kasapulan iti ania man a kaso a madesisionan.

Ngem, ala, nalpasen ti amin. Nayulogen ti desision. Agserbi koma ita ngarud daytoy a tulbek tapno maluktanen ti pampanunot ti tunggal maysa, aglalo dagiti adda iti gobierno, ket agarin ti transparency kadagiti amin nga opisina wenno indibidual.

Dakkel met ketdi ti naitedna daytoy umuna pay laeng a kaso ti impeachment iti pagiliantayo ta gapu itoy, adu la ketdi itan ti agbuteng a di mangideklara kadagiti kinabaknangda, uray pay iti dollar acoount-da. Ta no naikkat ti Kangatuan nga Ukom iti puestona gapu itoy a banag, isudanto la ketdin?

(Gibusna)