Statement of Assets and Liabilities and Networth ti nangpattog iti maysa a chief justice

Salaysay ni Rilo A. Bedo

 

KALPASAN ti uppat a bulan, wenno 44 nga aldaw a pannakadengngeg ti kaso, sipud nayuli ti reklamo ken ni Chief Justice Renato Corona, inyetnagen ti pangukoman a buklen dagiti duapulo ket tallo a senador ti pangngeddengda: Guilty! Nagbasol daytoy nga awan duadua.

Dayta ti nagbalin a resulta ti nabayag a tinartarabaytayo nga impeachment case a nakagastuan ti prosekusion iti P5.7M. (Ne, di a ngumato ‘ta kidaymo, ‘tanud, ‘mare, ta million a talaga ti nabusbos.) Kayatna a sawen, kombiktadon ni Corona. Maikkaten iti puestona; maikkat amin a benepisiona ken saanen a mapalugodan a sumrek iti ania man a posision iti gobierno.

Iti kampo ti prosekusion, kasapulanda ti dua nga apagkatlo (2/3) a butos (mapan a 16 a senador) tapno magun-odda ti tartarigagayanda a pannakaikkat ni Corona iti puestona; idinto nga apagkatlo (1/3) a butos (mapan a 8 a senador)  ti gamgamen ti depensa tapno mawaswas ti kaso ti klienteda.

Ket kas nasaon, 20-03 ti resulta pabor iti prosekusion.

Adu ti nagdir-i a kailian kalpasan a kinumpleto ni Sen. Ramon Revilla, Jr. ti maika-16 a butos a kasapulan ti prosekusion. Nagari kano met laeng ti kinapudno, inyik-ikkisda.

Ken napaneknekan nga awan ti nababa ken nangato a tao no gamat ti linteg ti magna.

Kas met ninamnama, adu met ti limdaang iti napasamak, aglalo dagiti katrabahuan ni Corona, dagiti nakisimpatia kenkuana aglalo ti pamiliana. Ngem ti napateg ditoy, inaklon ni Corona ti pangngeddeng ti pangukoman nupay nasakit ti nakemna ta segun kenkuana, nagna/nagari ti “dakes a politika.”

“Ngem makaammon ti Namarsua,” kinunana.

Ketdi, iti pamilia Corona, adda dakkel a naitulong daytoy a pasamak kadakuada. Nagkakappiada nga agkakabagian a di aglalaing iti uneg ti tallo dekada gapu kadagiti sanikua. Daytoy ti dakkel a konsolasion!

Naunday met a panawen nga inur-uraytayo ti pagtungedan daytoy a kaso. Idi damo, walo nga artikulo ti imparang ti prosekusion a pangidarumanda ken ni Corona tapno ma-impeach daytoy. Ngem idi agangay, nagtinnag laengen a tallo. Naitalimudok dagitoy iti saan nga umisu a panangideklarana iti SALN-na wenno Statement of Assets, Liabilities and Networth; ti panangyulogna iti Temporary Restraining Order (TRO) pabor kadagiti agassawa nga Arroyo; ken ti kinaawan ti panagtalek dagiti umili iti kredibilidadna a kas kameng ti hudikatura ta dina napataran ti ibagbaga ti Artikulo 8, Seksion 7 ti Konstitusion nga agkunkuna: A member of the judiciary must be a person of proven competence, integrity, probity, and independence.”

Ta apay? Malagip a ni Corona ti maysa kadagiti makunkuna a midnight appointees ni dati a Pangulo Gloria Macapagal Arroyo. Inkamakam ti pannakaipatugawna a kas kangatuan nga ukom. Adu ti mamati nga inaramid daytoy ni Arroyo idi ngannganinan panawan ti puestona tapno iti kasta adda dakkel a pader a pagsadaganna inton makamaten kadagiti nagbasolan/nagkuranganna kadatayo nga umili.

Ket bayat ti panagtugaw ni Corona, adu a kaso ni Arroyo ti winaswasna. A nagpudotan met ti agdama nga administrasion kenkuana, ken no patien, dagiti kaaduan nga umili segun kadagiti nangiyuli iti darum.

Gapu itoy, naawan kano ti kredibilidad ni Corona a mangiggem iti rienda ti hudikatura ta adda pabpaboranna wenno salsalaknibanna. Ken daytoy ti maysa a rason no apay a kayat ti prosekusion a ma-impeach.

Ngem ken ni Corona, panagibales laeng daytoy. Ta no subliantayo dagiti pasamak, pinaboran ni Corona dagiti babassit a mannalon iti Hacienda Luisita. Imbilinna ti pannakaiteden ti daga kadagitoy a mannalon ta isuda  ti napudpudno nga agtagikua kadagitoy. Ti Hacienda Luisita ket kukua ti pamilia a nagtau-dan ni Presidente Noynoy.#