Street sweepers iti Vigan City, nanayonan

VIGAN CITY – Nanayonan dagiti parasagad iti kalsada tapno mataginayon ti kinadalus ti aglawlaw ditoy siudad, daytoy ti impakaammo ti hepe ti city government service office iti session ti sangguniang panlungsod itay nabiit.

Kinuna ni GS Officer Kenneth Victa a gapu ta immadu ti basura gapu iti kaadu dagiti turista isu a nagnayonda iti sangapulo pay a parasagad kadagiti kalsada iti siudad.

Kinunana nga agdagupen iti nasurok tallupulo dagiti street sweepers ket adda naituding nga iskediul nga agsagad dagitoy kadagiti kalsada iti agmalmalem agingga iti rabii tapno mataginayon ti kinadalus ti aglawlaw iti siudad nangruna ti plasa ken iti Heritage Village a paborito a pagpallailangan dagiti turista.

Kapaliiwan a kalpasan ti pannakabutos ti Vigan City kas New7Wonders Cities of the World, dimmakkel ti bilang dagiti turista nga agpallailang ditoy siudad ket immadu ti basura.#