Subsidy dagiti mannalon, agtultuloy

STA. LUCIA, Ilocos Sur – Agtultuloy ti subsidy program ti bin-i para kadagiti mannalon ditoy nga ili, segun ken ni Floricadel Lopez, municipal agriculture officer.

Kinuna ni Lopez a babaen daytoy a programa, kagudua laeng ti bayadan dagiti mabenepisiaran a mannalon agsipud ta ibaklay ti munisipio ti kaguduana.

Agbalor iti P1,200.00 ti tunggal sako ti certified seeds ket babaen ti subsidy program, agbalin laeng a P600.00 ti bayadan dagiti mannalon ta ibaklay ti municipal government ti P600.00.

Kinuna ni Lopez nga agdagup iti P500,000.00 ti nailatang a pondo para iti nasao a programa a nakagatangan iti aganay 600 a sako ti certified seeds.

Nupay kasta, mapapati nga agkurang daytoy ta adda agarup 3,000 a mannalon ditoy nga ili.#