Sueldo contractual doctors, manayonan

VIGAN CITY – Maysa a resolusion ti impila ni Bokal Jerry Singson a mangnayon iti sueldo dagiti doktor a kontraktual nga agserserbi iti Gabriela Silang General Hospital.

Sagudayen ti nasao a resolusion a manayonan ti sueldo dagiti full time contractual doctors iti P24,000.00 manipud iti P15,000.00 ken dagiti part-time contractual doctors iti P15,000.00 manipud iti P9,000.00.

Kinuna ni Singson a napanunotna nga impila ti nasao a resolusion agsipud iti kapaliiwan a narigat dagiti mangimaton iti Gabriela Silang General Hospital ti agawis kadagiti espesialista nga agserbi iti hospital gapu iti kababa ti sueldo dagiti contractual doctors kasta met ti nadaras a panagpanawda nga umalis iti sabali nga ospital agsipud ta nangatngato ti itanggayada a sueldo kadagitoy.

Kinuna ni Singson a no manayonan ti sueldo dagiti contractual doctors, sumaysayaat ti serbisio ti salun-at a maipaay iti Gabriela Silang General Hospital.

Apaman a mapirmaan ni Gov. Ryan Singson ti resolusion, maipatungpalen ti pannakanayon ti sueldo dagiti contractual doctors, kinuna ti bokal#