Sugal iti lawwalawwa, napasardeng

STO. DOMINGO, Ilocos Sur – Kalpasan ti panangibutaktak ti maysa a konsehal ti panagraira ti sugal iti parkingan ti lugan a pakaaramatan ti lawwalawwa, nagtignay ti kapolisan ditoy a nangpasardeng iti daytoy a sugal.

Dinillaw daytoy ni Konsehal Aquiles Udarbe gapu iti kapaliiwanna a napigsa a pagsusugalan iti tiendaan-publiko ti panagpipinnanget iti lawwalawwa.

Naammuan a daytoy ti nasumok a pagsusugalan dagiti traysikelan nga agparparking iti Barangay San Ramon ken San Clemente bayat ti panagur-urayda iti pasahero.

Mapapati nga adda pay maabak iti rinibu iti daytoy a sugal ken adda dagiti nangisalda iti luganda tapno makaabrotda iti pannakaabakda.#