Komentario: Addan kompirmado a suicide bomber a Pilipino | Tawid News Magazine - Weekly Ilocos News 📰

Addan kompirmado a suicide bomber a Pilipino

MAPAGAM-AMKAN ti posible a kumaro ti terorismo a panagbomba iti Pilipinas nangruna sadiay Mindanao gapu ta mapatured dagiti Muslim extremists wenno Islamic fundamentalists iti pagilian kalpasan a kinompirma ti Armed Forces of the Philippines ken Philippine National Police a Pilipino ti maysa kadagiti dua a suicide bombers iti panagbettak sadiay Indanan, Sulu idi Hunio 28, 2019.

Inrakurak da AFP Spokesperson Brig. Gen. Edgar Arevalo ken PNP Spokespam Colonel Bernard Banac a Pilipino ti suicide bomber a ni Norman Lasuca, 23, a maysa kadagiti nangitugot iti bomba a napabettak iti sango ti kampo ti Army.

Maibasar iti report ti Regional Crime Laboratory Office of the Police Regional Office 11 sadiay Davao City, naduktalan a 99.99% nga agpada ti DNA sample iti bangkay ti suicide bomber a ni Norman Lasuca, ken sample ti inana a ni Velman Alam Lasuca, ken ti kabsatna a ni Alhussin Alam Lasuca.

Daytoy pay laeng ti umuna a nakompirmaran a kaso ti suicide bombing iti Pilipinas a nakairamanan ti maysa a Pilipino. Mapagbutbutngan a mabalin a kumaro pay daytoy a taktika dagiti lokal a terorista ta saan a sigud nga ar-aramiden dagiti Pilipino iti naglabas agingga iti kaudian a panagbomba sadiay Sulu.

Saan pay a naduktalan dagiti imbestigador ti kinasiasino ti kadua ni Lasuca a maatap nga anak ti Moroccan a suicide bomber a naglugan ti napabettak a van sadiay Lamitan, Basilan idi Hulio 31, 2019.

Im-imbestigaren dagiti polis a ti Sawadjaan faction ti Abu Sayyaf Group ti adda iti likudan iti panagbomba sadiay Indanan ken Lamitan, ken ti panagbettak iti Jolo Cathedral sadiay Sulu idi Enero 27, 2019. An-anupenen ti AFP dagiti ASG ken dadduma pay a terorista a grupo.

Napasamak ti panagbomba a nakairamanan ni Lasuca iti sango ti kampo ti Army Counter Terrorism Unit sadiay Brgy. Kajatian, Indanan, Sulu idi malem ti Hunio 28. Pito ti natay a pakairamanan dagiti uppat a soldado ken tallo a sibilian, ken 12 dagiti nasugatan iti dayta a panagbettak.

Maibasar iti report iti AFP Western Mindanao Command, tallo a lallaki a mapagduduaan ti langana ti pinasardeng dagiti soldado iti military checkpoint iti asideg ti kampoda. Maysa laeng kadakuada dagiti nakita dagiti soldado nga adda ikutna nga Improvised Explosive Device a naikarga iti bag. Ti natiliwan iti IED ket kinuyog dagiti soldado nga agturong iti guardhouse ti kampo. Kabayatan a madama nga ins-inspeksion dagiti soldado ti bag, napasamak ti panagbettak ti bomba.

Kalpasanna, maysa kadagiti kadua ti suspek ket kellaat a nagtaray iti uneg ti kampo ket bimtak ti iggemna a bag. Masuspetsa a bimtak dagiti bomba babaen ti remote device.

Patien ti AFP a ti panagatake ket wagas a pangtaktak ti nainget a military security operations iti dayta a paset ti Sulu.

Kalpasan ti panagbettak, nabigbig ni Velman Aman Lasuca, ti ulo ti maysa kadagiti suicide bomber a ti anakna a nabayagen a saanna a nakita manipud pay idi nagpukaw idi 2014 ta kimmuyog kadagiti bandido gapu iti pannakagargarina iti paltog ken kuarta.

Madama pay laeng a taktakuaten ti AFP ken PNP ti koneksion ti suicide bombing iti Indanan Sulu kadagiti nagkauna nga umasping a panagbomba kas ti napasamak panagbettak iti maysa a van iti military checkpoint sadiay Lamitan, Basilan idi Hulio 31, 2018, ken ti panagbomba kabayatan ti Misa iti bigat ti Domingo sadiay Our Lady of Mt. Carmel Cathedral sadiay Jolo, Sulu idi Enero 27, 2019.

Iti panagbomba sadiay Lamitan, maysa a puraw a van a naglaon iti eksplosibo, ti napasardeng sadiay Magkawit detachment security checkpoint iti nagbaetan ti barangays Bulanting, Colonia, ken Maganda idiay Lamitan, Basilan a bambantayan dagiti Civilian Armed Forces Geographical Unit. Ti napara a van ket agturong iti Lamitan City proper ken bimtak iti alas-5:50 iti bigat idi pababaen dagiti CAFGU ti drayber. Agdagup iti 10 dagiti natay iti panagbettak, ken lima kadakuada ti CAFGU, ken maysa a soldado. Dua met a CAFGU ken lima nga Scout Rangers dagiti nasugatan iti panagbettak.

Naduktalan iti imbestigasion a ti bimtak a bomba ket IED a naaramid iti ammonium nitrate a nalaokan iti fuel oil. Ti bomba ket kapada iti nausar iti Cotabato City bombing idi 2013.

Iti met panagbomba iti Jolo Cathedral idi Enero 27, 2019, naaramat ti Ammonium nitrate pipe bomb. Duapulo dagiti natay pakairamanan dagiti 14 a sibilian, lima a soldado ken maysa a kameng ti Coast Guard. Nasurok met a sangagasut dagiti nasugatan.

Napasamak ti panagbomba makalawas kalpasan ti plebisito ti autonomia idi Enero 21, 2019 para ti pannakabukel ti Bangsamoro Autonomous Region. Mapapati a ti panagbomba ket insayangkat ti ASG, ken indeklarar ni Presidente Rodrigo Duterte ti “all-out war” konta kadagiti ASG.

Nakalkaldaang a pasamak ta kalpasan ti innem a bulan manipud idi napasamak ti suicide bombing iti Jolo Cathedral ket maysa manen a suicide bombing ti napasamak iti kampo ti Army. Napasamak daytoy iti laksid ti “all-out war” kontra kadagiti terorista, ken kabayatan a maipakpakat ti Martial Law iti intero a Mindanao. 

Nagkas-ang a pagteng ta natakuatan a Pilipino ni Nelson Lasuca a maysa kadagiti natay a suicide bomber, Muslim nga agtutubo a gapu iti kinarigat ti biag ket naallukoy a nakikappeng kadagiti terorista nga ASG.

Naglayus iti botos ni Presidente Duterte idi 2016 nangruna kadagiti kalugaranna sadiay Mindanao. Nangnamnama dagiti nangbotos kenkuana nga iti administrasionna ket magibusanen dagiti krimen ken terorismo iti pagilian nangruna sadiay Mindanao. Ngem kasla kumarkarit dagiti terorista ta tumurturedda metten ta kabaelandan ti agpakamatay nga agimet ti mapabettak a bomba gapu iti naballikog a pammati nga inyadal kadakuada dagiti Muslim extremists. Tallo pay a tawen ti nabati iti termino ni Presidente Duterte, ket mangnamnama dagiti Pilipino a matungpalna ti karina sakbay ti maudi nga aldawna iti turay.