Sultana (Maikadua a paset)

**sampel ti counter clockwise structure wenno immatras a sarita

 

II.

 

NADAGAANG daydi naulimek a sardam. Kalkalpasmi a nangan iti pangrabii, ket addakami a sangapamilia – dagiti tallo nga annakko, ken ni baket iti sanguanan ti telebision iti salas. Pangpalabasan ti oras sakbay a maturog; uray ta awan met klase dagiti ubbing ta Sabado met no bigat; isu nga uray maladawda a maturog ita. Nupay agan-andar ti agpuspusipos nga electric fan, adda pay laeng ti pamaypay nga iggemko.

Immalingawngaw ti taul ni Sultana. Taul a dumukduklos. Nakaro unay a duklos, a kasla ketdin adda paritanna a lumabas iti dalan iti sanguanan ti balay. Asino dayta a paritanna? Nangngegmi ti timek ni Viring, ti balasang ni Mang Anton a kaarrubami, a mangbugbugaw ken ni Sultana.  Dayaen laeng ti balayda ti balaymi.

Ita man pay a taulanna ni Viring? Ne, karkarna daytoy a! Nagtinnalliawkami ken ni baket a dagiti laeng matami ti agsasao. Nagdardarasak a rimmuar. Simmurot ni baket. Dinugsakko ni Sultana. Inyad-addana ketdi a taulan ken duklosen ti balasang. Kasla saanna a kayat a lumabas ti balasang. Naa, nagkaron!

Dugsak met a dugsak ti balasang.

Inlukat ni baket ti silaw iti ruar ket limmawag ti dalan. Nakita ni Viring ti naibalangan a banag iti sangona a kasla punguapunguan ti kalukmegna ken nasurok ngata a sangaagpa iti dua a metros. Pidutenna koma ti naibalangan ta isu ti pangbautna ngata iti aso ngem saan a pinalubosan ni Sultana.

Manipud iti nagtakderan ni Sultana, limmagto iti nakangatngato ket apagisu iti sanguanan ni Viring. Imkis ni Viring. Pinukkawak metten ni Sultana ngem nagtuloy ti panagtaul ti asok, ken dimmuklos-duklos, saan a ti balasang no di ket ti naibalagbag a banag iti dalan. Isu dayta ti dukloduklosenna. Naggunay nga in-inut ti naibalagbag, naguyas, ket kinamangnan ti puon dagiti bayog.

Amaya, nagdakkelen nga uleg!

Imkis ni Viring iti nakitana ken agnernerbios. Makasangiten.

Nalabit a naggapu ti uleg idta kakaykaywan wenno iti kinawayanan iti kali iti amiananen ti balaymi. Gapu ta nadagaang ket nagpasiar? Wenno agsapsapul ket ngata iti pagitloganna wenno pagluposanna?

Nagsardeng metten a nagtaul ni Sultana, nakauy-oy ti dilana, nakatugaw a mangperperreng iti balasang. Inarakup ti balasang ti tengnged ti aso.

“Ayna, agyamanak, Sultana, tenkio unay unay! Insalakannak, ayna, ti ason aya, ta nagsayaaten…” kinuna ti balasang ket agsangiten.

“Nagturongannan?” Ni baket a nakaigpil iti bellang.

“Dita yan ti puon dagiti bayog. Kasla takiag ti kalukmegna!” Kinudkodko ti saan met a nagatel a tuktokko.

“Nagistayankan, Viring…”

“Wen, ngarud, manang, naimbag ta adda ni Sultana ta no saan, nakagatak koman!” Inar-arakupna latta ti tengnged ti aso a di met agtagtagari no di laeng agkalkalawikiw ti ipusna nga imol – tallo a pulgada laeng ti kaatiddogna.

Saan la dayta ti naaramidan ni Sultana a pagsayaatan…

Kas iti naminsan nga agtutugawkami iti sungaban ti linapogan: ni Doming, Carlo, Berto ken Tomas dagiti kaduak ket pagsasaritaanmi dagiti mulami a mais ken lasona idi napasungadanmi ni Sultana nga agdardaras ken agan-aneng-eng a simmangpet. Kinagatna ti tisiert ni Doming a nakamasngaad iti tambak a kasla guyguyodenna.

“Kasla adda kayatna nga ibaga, Doming?” kinunak, ket nagkikinnitakami. Pagammuan, nagtaray ni Sultana. Sintimek, nagdardaraskami a nangsaruno iti aso. Agturong daytoy iti arubayan da Doming, iti abagatan ti balayda. Adda bubon dita a narabaw ken awan ti danumna no kastoy a kalgaw. Iti lauden ti balayda, umarikiak ti immak ti pangganakan a kaldingna a kasla pukpukkawanna dagiti alikuteg a dua nga urbonna.

Napan iti ngarab ti bubon ni Sultana ket nagtaultaul. Adda nagemmak iti uneg ti bubon! Ti urbon a kalding ni Doming!

Kinamang ni Doming ti naipasanggir nga agdan iti puon ti silag ket isu daytoy ti inaramatna a nangiyaon iti agkakapsut nga urbon.

“’Nal-iten, dikanto pay la ngamin gaburan met daytoy ta di ket makadisgrasia!” binabalawko ni Doming nga agkatkatawa. “Amangan no saan laengen a dagiti tarakenmo ti maiyabut no di pay ket sikan a mismo, salbag!”

Adu a, dagiti dinto malipatan a naaramidan ti Sultana…

Kas iti maysa a malem nga agin-innagaw ti sipnget ken lawag ken madama nga agpatpatangkami ken ni Ambot – Carlito ti buniagna — nga adingen ni Viring ken agis-iskuela iti hayskul — maudin a tukadna iti sekundaria iti Narvacan National Central School, idi napasungadanmi ni Sultana nga aggapu iti bit-ang iti laud. Kustuonay ti partakna nga agturong iti yanmi. Idi nakadanon iti yanmi, kalawikiw a kalawikiw ti ipusna sa taul a taul kadakami. Ipatok lattan nga adda kayatna nga ibaga. Ta naipaugalinan dayta a tabas no adda ibagana.

“Ania daydiay, Sultana?” kinunak a pinerreng. Ngem nagbuelta ketdi a kasla agsubli manen iti naggapuanna. Nagsardeng kalpasan ti lima ngata nga agpa sa nagtaultaul – a kasla kayatna a sumurotkami. Nagtinnaliawkami ken Ambot ket sintagari, sinurotmin ni Sultana. Nagtaray a nagpalaud, idinto ta impaspaspasmi met dagiti addangmi.

Kinamangmi ti bit-ang a simrekan ni Sultana. Adda  nakitami a nakadata ken nakadeppa a tao iti tengnga ti bit-ang a masilnagan ti streetlight agarup uppat nga agpa ti kaadayona. Agarup sangaagpa iti kaadayo ti payabyab iti lampong nga ubanan a lakay. Nagkalawikiw ni Sultana sana intugaw iti sikigan ti nakadata.

“Ni amang!” nayesngaw ni Ambot.

(Adda tuloyna)