Sultana (Maikatlo a paset)

Ababa a Sarita ni Jaime M. Agpalo, Jr.

**sampel ti counter clockwise structure wenno immatras a sarita

 

Minirak a nalaing ti nakadata ken nakadeppa nga amangna. Pumanerper ti urokna, amaya! Napaisemak idi nautobko a a naggapu daytoy iti punsionan idta amianan. Agadiwara ket ti ingel ti sammigel nga ipugpug-awna!

“Ania la ket ti laklakayanen, Apo, dina la naidanonen iti balay ti bartekna!” immisuot pay ni Ambot ti suronna. Urayna la wagwagen dagiti abaga ti nakadata; ngem kaskarina, aya, a mariingmo ti nalabes ti bartekna a tao? Napaisemak laengen a nangkudkod iti saan met a nagatel a tuktokko.

“Ala, bay-amon a, ania ngarud, no dinan kabaelan ti magna. Awitentan a, nga ‘yawid uray ta asideg met,” inyay-ayok ken ni Ambot. Iniggamak nga impangato ti agsumbangir a saka, ken kiniddakiddayak nga umis-isem ti barito tapno igpilanna met dagiti abaga ni Mang Anton tapno yawidmin iti balayda…

Naminsan nga agsapa ti Sabado iti bulan ti Agosto. Agarup tallo a lawasen nga inaldaw nga agtudo. Dakkelen ti danum iti kali iti amianan ti balay ta sumuso dayta iti karayan iti daya ken agturong iti kataltalonan idta laud. Iti aglawlaw, gumanakgaken dagiti gakong ken tukak iti sardam. Naariwawan dagiti bullfrog iti aldaw ken rabii. Agluludonen dagiti netib a bisukol ken duyaw a golden kuhol nga agsawar met ngata iti pagbiagda. Iti agus ti danum iti kali iti masansan a pakataldiapak iti panagpilaw ken panaglagto ti burikaw wenno ti panagkalasawan ti nagtata a paltat. Isu a napanunotko a mapanakto man gumatang iti karburo no madamdama idiay ili ta usarek manen ti iduldulinko a lampa, ta innakto agsilaw ken agasad no sardam dita kali ta imbag la pammigatan dagiti ubbing ti makalapan. Lalo ket kasla naimemorian san ni baket ti kanayon nga ipasidana a pammigatanmi. Saanko met ketdi a babalawen ni baket ta katibok ngarud ti panagkames iti ruot kadagiti rinaepan, ket isu dayta ti rason a saan a pakatiendaan ni baket iti masida sadiay ili; no ania ti adda a dulin iti repridieretor wenno ania ti magatang a lako iti kantina ni Siding, isun ti ilutona nga idasar, ania ngarud, anus a!

Ita a bigat ti Sabado, mammigatkamin ta nakaidasaren ni baket ngem masimron dagiti annakmi ta nagtitinnaliawda pay, ken nagmisuotda a napasarunuan iti kudkod ken biragsot.

“Itlog manen! Ne, maikainemen nga aldaw a pasig nga itlog ti pammigatan. Agsinnublat met laengen ti prito nga itlog ken liningta nga itlog! Awan met la sabali nga ipasidamon, mamang!” inreklamo ti inaunaan, ni Albert. “Amangan no makaimbentoka pay iti tinuno nga itlog ken pinaksiw nga itlog!”

Napakudkodak met iti saan a nagatel a tuktokko ket timpuar ti isemko nga uray la agsaringgayad iti suelo. Saan la gayam a siak iti nakadlaw!

“No umuttotka idiay eskuelaan, agadiwara ti buyok ti agat-itlog! Maammuanda a dagus ti immuttot uray di aguni ti uttot!” impasaruno ni Junjun nga immisuot. “Isu nga inkapilitan a kanayon a rummuar datao iti siled ta makapauttot met ti kanayon nga itlog! Kababain payen iti maestrami iti kanayon nga Excuse me, Ma’am, may I go out…”

Nagtapaya met ni Aprilene ket kinunana: “Agkapeak laengen, dakayon ti mangan…”

“Ala, ket aganuskayo a, annakko, ta ne, panagtutudo ngarud, saanak a makatienda idiay ili, sa ket isamira pay ti mapan agkames idta rinaepan . Aganusda a, saan kadi, Sultana?” kinuna ni baket nga umis-isem ken mangtaltaliaw ken ni Sultana a nakatugaw.

Uray no kasano ti panangay-ayo ni baket kadagiti tallo nga annakmi a  mammigat, saanda a kinuti ti memoriado wenno kas iti kuna ti bugtong a babai, inkabesan ti inada a sidaen a pammigatan. Isu a nagkapeda laengen.

Awan met ti nakadlaw iti ipapanaw ni Sultana. Napananna ngata?

Uray siak ket dillawek koma met daytoy nga inkabesa ni baket a pammigatan, ngem binay-ak lattan ta di marubroban ti rurod ken simron dagiti ubing iti inada. Nagulimekak lattan nga umis- isem.

Dandanin maibus dagiti ubbing ti in-inutenda a kape, idi napasimadanmi nga agdardaras a dumalagudog ni Sultana ken kinamangna ti bangsal iti yan ti timba, sa pagammuan ta nakangngegkami iti nagpalagapag. Nagdardaras a napan kinita ni buridek no ania dayta nga insangpet ni Sultana.

“Nagdakkel a burikaw ti insangpet ni Sultana!” kinunana a maragsakan a nangarakup iti tengnged ti aso a nakatugaw.

“Sibibiag pay met. Dalusanyo ngaruden ta ibarbakua a pammigatan!” kinuna ti inaunaan.

“Bugguong ngarud ken sili, sa pespesan iti dalayap ti pagsiwsiwan ta naim-imas!” kinunak met ken ni baket.

(Adda tuloyna)