Sultana (Maikalima a paset)

Ababa a Sarita ni Jaime M. Agpalo, Jr.

**sampel ti counter clockwise structure wenno immatras a sarita

 

“Gayam! Iti kapsutnan, di payen makakaan!” inggarakgakko. Ngem naklaatak pay iti inaramid ti inaunaan.

“’Mo ta siak ti mangpakan,” kinuna ketdi, innalana ti uken ken ni Boy Muslim ket sigagagren a simrek iti balay. Diak met nakatimek. Kinudkodko ti saan met a nagatel a tuktokko. Ania la ket ti anakkon, aya, agtaraken ketdin iti agngangabiten a matay.

Nagandar ti traysikel, ket nagpakadan ni Boy Muslim. Nabatiak la ket ngarud nga agmalmalanga!

Napanko kinita ni Albert no ania ti ar-aramidenna iti aso. Madama a paggatgatasenna ti uken babaen ti panangisawsawna ti paniona iti gatas iti baso sana pespesen iti pinangangana a ngiwat ti uken. Nalab-ay ti isemko a mangkudkudkod iti saan met a nagatel a tuktokko. Ti la ket masarsarakanen, apo!

Simmangpet dagiti agiina. Siraragsakda met ta naaddaandan iti taraken nga aso.

“No mabiag a, dayta!” inngayemngemko ketdi ta naaronan ti busorko. “Uray pupuotenyo ti kunak, saanen a mabigatan dayta, maungkelen!”

Ngem nabagas ti perreng ni baket kaniak, a pinasarunuanna iti ngilangil. A kasla dakkel ti pammabalawna ta diak man  pulos nga ited ti uray no palpalawpaw koma a suporta kadagiti annakmi. Wen, aya?

“Agbisikletaka a mapan idiay ili, Albert,” kinuna ketdi ti inada. Nagtitinnaliawkami. Ania ngata met ti pampanunoten daytoy a bakbaketan, aya? nakunak iti nakemko. “Gumatangka iti purga idiay farm supply ta purgaenyo dayta, ta sumayaat ti bagina!”

“Dog shampoo ta digosentayo pay ken pulbos a kontra iti timel!” innayon met ni Aprilene, “Kasta ti aramid ni Ma’am Liza iti asoda a ni Britney!”

Dagiti dua a lallaki ti siraragsak a nagdisnudo a mapan gumatang iti purga, dog shampoo ken kontra timel. Rimmuarak metten, mapanko laeng suknalan ti lasonaak no mabalinen a palayasan. Iti daytoy a situasion, awanen ti pagtaktakderak a kalintegan. Binay-ak lattan ida. Total, isuda met ti agtaraken, saan? Ken wen, nalabit a husto ni baket. Nasken nga ited ti suporta kadagiti aramid dagiti annak.

Ngem idi nakaawidak, nadatngak manen dagiti agiina nga agpipinnapilit no ania ti ipanaganda iti uken. Pati pay dayta a banag, dida agkikinnaawatan? Napakudkodak manen iti saan met a nagatel a tuktokko. Ita laeng a naammuak a babai gayam ti uken.           Irengrengreng ti inaunaan ni Albert a Christina ti ipanagan ta inadawna kano dayta manipud iti nalatak a singer a Christina Aguillera. Ni Aprilene, J-Lo met ti kayatna, manipud kano dayta ken ni artista a Jennifer Lopez. Ti buridek, Princess ti ipappapilitna ta isu kano ti prinsesa iti pamiliami. Aysus, ambisioso met dagitoy nga ubbing, nakudkodko manen ti saan met nga aggagatel a tuktokko.

“Tapno awan ti riri, bay-anyon ta ni papangyo ti mangted iti naganna,” kinuna ti inada nga umis-isem. Pinasarunuan met dagiti tallo nga annakmi.

Didak man iramraman iti kalokuanyo, kunak koma nga idil-ag ngem amangan no ingilangilto manen ni baket a diak pay maited met ti suportak iti sangkabassit a pagragsakan dagiti annakmi. Agparparangen a siak ti kill joy wenno kontrabida. Madi a. Ala, wen, ited ti suporta kadagiti annak, ania ngarud.

“’Tay kiut a nagan, papang, a!” kinuna ni Aprilene, nga immarakup pay kaniak.

Ket amin a mata, naiturong kaniak, agur-urayda iti sawek.

“Naggapu ken ni Boy Muslim dayta. Ti pangulo dagiti Muslim ket sultan, ngem babai met dayta a kunayo, di mabalin a…” Ket nakalablab-ay ti sanapsapko.

“Di Sultana, ta babai!” inyagaw ni Aprilene.

Ket inayonanda amin dayta a proponer a nagan ti aso. Naayatan dagiti ubbing a nangpanagan iti Sultana. Lalo idi innala ti inada ti uken, intag-ayna ken kunana nga inyikkis: “Sultana!” Ket nagtitipat dagiti ubbing iti di mailadawan a ragsakda.

Nagduaak pay ti nangkudkod iti di met nagatel a tuktokko, ngem nairayoakon kadakuada ta umis-isemak metten.

Kasta ti pannakabuniag ni Sultana…

(Maigibusto)