Sumangbayka, Pope Francis

Mannurot: Kolum ni Danny Antalan
(Maudi a Paset)

Malaksid iti Pilipinas, dinalapus pay ni Haiyan ti pagilian ti Micronesia ken Palau, Southern China ken Vietnam.

Iti Pilipinas ti nakakitaan ti nakaal-alinggaget a pasamak nga uray tagtagainep ket narigat pay mapasamak. Agkaraiwara ti natay. Agsangit dagiti tattao, ti pagilian ken ti nakaparsuaan. Ngem nagtignay ti lubong ti tao, nagtitinnulong ti sangalubongan tapno matulongan dagiti kakaasi a kasla piek a nakaro a nakutoran iti bagyo.

Agpapan ita, adu pay laeng ti agbibiag iti buteng, adu pay laeng ti dina kayat maturog tapno dida makita manen ti batibat. Ti rigatna, nalaokan ti pulitika ti ultimo panangtulong kadagiti biktima a nagresulta iti ad-adda a panakadasig kadagiti biktima sadiay.

Ngem sakbay dagitoy a batibat ti lubong, nalayus ti Metro Manila, saan a gapu ti bagyo no di ket ti monsoon rain. Narneb dagiti pagtaengan ken nagsardeng ti negosio ken taray iti kalsada iti sentro ti pagilian.

Ket iti daytoy a tawen, simmangbay ti sabali manen a pannubok. Dimmalapus ni bagyo Ruby iti lugar a dinalapus met laeng ti ginggined, ti supertyphoon ken ti layus naindaklan a layus.

Inspirasion

No daytoy ti tawen ti pammati, mabalintayo kunaen a nalasattayo. Daytoy ngatan ti maysa a kadagsenan a panangsuot iti pammati. Kasla ti tawen ni Moises iti panangibalasiwna kadagiti Israelitas manipud iti Ehipto; kasla tawen ni Noe iti sangalubongan a layus.

Ket ita, adtoy ti namnama ti Pope Francis ditoy Pilipinas. Umay ditoy Pilipinas tapno mangted kired ken sarikedked kalpasan kadagiti pannubok. A kalpasan a naparintumeng dagiti umili iti kinarigat ken kas-ang, agparintumengda manen iti kararag ti namnama ken lawag. Adtoyen ti sungbat kadagitoy amin a pannubok.

Namnama ti inanamaen iti Santo Papa. Nangruna kada-giti nasuot nga umilina iti Bohol, Cebu, Tacloban City ken iti sibubukel a Visayas, ken dagiti nalayus iti Metro Manila. Adtoy ti puraw a kalapati nga agbatay iti kayo ti namnama ditoy pagilian. Adun ti mangpadpadaan iti Pope Francis intono Enero 15. Kayatna a makasango dagiti naparigatan ken nasuot. Kayatna a kasango dagiti marigrigat. Kayatna a makasarita ida.

Sarabuentayo ngarud, saan a babaen iti kinabaknang ken kinangayed ti Santo Papa. Sarabuentayo isuna iti namnama. Ket sapay koma, ta kasta ti mapasamak, amen.#