Sumangbayka, Pope Francis

Mannurot: Kolum ni Danny Antalan
(Umuna a Paset)

Kalpasan ti baro a tawen, sumaruno ti panakarambak ti Nangisit A Nasareno ti Quiapo Church. Kalpasan ti sumagmamano manen nga aldaw, pumasiar met ni Pope Francis. Isu ti maikadua kadagiti Santo Papa a sumangbay iti Pilipinas—ti kakaisuna a pagilian iti Asia a Katoliko ti kaadduan nga umilina.

Itoy a gundaway, adun ti magagaran. Adun ti agsagsagana ta kayatna a mairaman iti tallaong a pangisayangkatanna ti misa. No mabalin ket sarabuenda iti napnuan ngayed ken pabuluso.

Rumbeng kadi a sarabuentayo iti napnuan ngayed ken ray-aw ni Papa Francis intono Enero 15, 2015? Kadagiti makaam-ammo kenkuana, mabalin a dida kayat. Ta dina kayat nga umay ditoy Pilipinas a pasangbayan iti adu a banda, saganaan iti nabaknang a taraon, sarabuen dagiti nangangato nga opisial ti gobierno wenno taripatuen kas maysa nga espesial a parsua.

Umay ditoy Pilipinas tapno kumustaen dagiti umili ditoy pagilian ken sanguen dagiti marigrigat nga umili. Pagilian a dinerder dagiti nagkaadu a kalamidad ken didigra a nakatayan ti rinibu, nakarpuogan ti nagkaadu a sanikua, namsaak dagiti kaykayo iti bantay, nargaay a bantay, nanglapunos ti luglugar, ken nakadadaelan iti arapaap dagiti tunggal parsua.

Umay ditoy ni Pope Francis, ti kangatuan a posision iti relihion iti sangalubongan nga addaan iti nasurok maysa a bilion a kapamatian. Iti Pilipinas, pattaen nga 80% ti Katoliko wenno adda iti 80 a milion nga umili.

Tawen ti Pammati

Itay napalabas a tawen, tallo a nadadagsen a natural a didigra ti nangsuot kadagiti umili ti Pilipinas—nangruna dagiti agnanaed iti deppaar nga abagatan ti pagilian.

Awan ti nakaipadto nga adda mapasamak a ginggined idi Oktubre 15, 2013 iti Visayas a ti sentrona ket asideg iti Bohol. Iti kapigsa ti ginggined nga agarup 7.2 magnitude iti richter scale, narikna iti sibubukel a rehion ti Bisaya, narikna iti paset ti Mindanao ken Luzon.

Kas resulta ti nakaal-alinggaget a ginggined, 222 ti atapen a natay, walo ti mapukpukaw, 976 ti nasugatan, 73,000 a pasdek, simbaan ken pagtaengan ti narba wenno adda iti pakabuklan a P2.25 a billion a sanikua ti intayab ti kali a pakairaman dagiti kalsada, rangtay, ken proyekto ti gobierno. Iti pakabuklan, 671,103 a pamilia ti naapektaran wenno 3.2 a milion a tattao.

Karaman kadagiti narba dagiti daan nga istraktura a pakairamanan dagiti gasut a tawen a simbaan.

Di pay laeng nakaang-anges ti rehion, adda a simmangpet idi Nobiembre 7 iti dayta met laeng a tawen ti kapigsaan a bagyo ti lubong a ni Bagyo Yolanda wenno Haiyan iti internasional a nagan. Ni Yolanda ti kadangkokan a bagyo a nangdalapus iti pagilian.

Atapen a 10,000 a tattao ti natay gapu iti idadalapus ti makunkuna a supertyphoon iti isu met laeng a rehion ken 11 a milion a tao ti naapektaran. Agpapan kadagitoy a gundaway, adu pay laeng a pamilia ti awanan iti pagtaengan ken adu pay laeng ti agbibiag iti batibat. Awan pagbiaganda gapu iti panangparukma kadakuada ti bagyo.

Agarup P90 a billion ti nadadael.

(Adda tuloyna)