Summer Youth Camp, naangay

CERVANTES, Ilocos Sur – Nagkampo iti uppat nga aldaw dagiti sangguniang kabataan iti Villa Maria ditoy nga ili tapno mapatibker ti panagkakaduada nga agtutubo ditoy probinsia.

Segun ken ni SK Federated President Marie Gabrielle Kayla Mendoza, nadumaduma dagiti aktibidad a naisagana para iti panagkampo dagiti SK manipud itay Mayo 25 agingga iti Mayo 28.

Maysa kadagiti naipangruna nga aktibidad bayat ti summer youth camp ti cultural immersion tapno mapataud ti napigpigsa nga interaction dagiti taga-patad kadagiti taga-upland.

Nagpasiar pay dagiti SK kadagiti nadumaduma a barangay ket nagibunongda kadagiti school materials ken nangangayda kadagiti panagpakan ken paay-ayam kadagiti ubbing.

Nagmula pay dagiti agtutubo kadagiti kaykayo kas tulongda tapno mapaberde dagiti kabambantayan ken malapdan ti climate change.#