Sun Soaked Ilocos Sur 2015, naangay

CABUGAO, Ilocos Sur – Kas paset ti panangidur-as iti turismo iti probinsia, naangay ti surfing ken frisbee competition iti Barangay Sabang ken Pug-os ditoy nga ili idi Enero 9-11.

Tinarawidwidan ti Philippine Surfing Federation ken iti panangesponsor ni Congressman Ronald Singson ken ti gobierno probinsial nga indauluan ni Gov. Ryan Singson, kagiddan pay a naangay ti dragon board ken kite boarding competition sadiay Barangay Poro, Magsingal, Ilocos Sur.

Iti maysa nga interbio ken ni Congressman Ronald Singson, kinunana a maiyun-una ti pannakaangay ti water sports competitions tapno tuloy-tuloy ti panagsangpet dagiti turista iti probinsia.

Itay napan a tawen, naangay ti water sports competition iti Cabugao kabayatan ti Kannawidan Ylocos. Maselebraran ti Kannawidan iti maudi a lawas ti Enero ken umuna a lawas ti Pebrero, kasaruno ti panangselebrar ti Vigan City iti Piesta ti Konbersion.

Iti Barangay Sabang ti pakasarakan iti Kido’s Point a napintas a pakaangayan iti surfing competition gapu ta saan a paudi iti kadakkel dagiti agburak a dalluyon a kasapulan iti daytoy a water sport, kas idiay San Juan, La Union ken Sorsogon.#