Superbisor, pinalek ti padana a superbisor

ALILEM, Ilocos Sur – Iti ospital ti nagtungpalan ti maysa a superbisor iti konstruksion gapu iti panangpalek kenkuana ti padana met la a superbisor idi malem ti Marso 12 iti Sitio Pil-pil, Barangay Amilongan, ditoy nga ili.

Gapu ti sugatna iti ulo, naitaray ni Rey Sandria, construction supervisor ti Aboitiz Construction Group, Inc., Methapil ken residente iti Mandaue, Cebu, iti Tagudin General Hospital sa naiyalis iti Lorma Medical Center, San Fernando City.

Inaresto met dagiti polis ni  Alfonso Villondo y Aguisanda, 49, naasawaan, superbisor ken Quality Engineer ti Paramina Earth Tech, Inc. ken residente iti Nipaca, Cebu ket naikustodia iti police station ditoy.

Sakbay ti insidente, adda dagiti dua iti construction site ngem adda saanda a nagkinnaawatan.

Pinidut ti suspek ti maysa a leveling tri-pod ket daytoy ti impalekna iti biktima a nagsagrapan daytoy iti dunor iti makannigid a paset ti ulona ken nakapukawan ti puotna.

Saan a nailanad iti blotter no ania ti saanda a nagkinnaawatan .#