Suplay ti bagas, saan nga agkurkurang – NFA

BANTAY, Ilocos Sur – Impatalged ti pangulo ti National Food Authority a saan nga agkurkurang ti suplay ti bagas iti probinsisa iti sanguanan ti mapapati a kaadda ti krisis daytoy kangrunaan a taraon dagiti umili ditoy pagilian.

“Adda umdas a suplay ti bagas para iti Ilocos Sur,” kinuna ni Engr. Fortunato Bulao, provincial manager ti NFA idinto nga inalay-ayanna ti panagamak dagiti umili iti panagkurang ti bagas iti probinsia.

Impalgak ni Bulao nga adda aganay 30,000 a sako ti bagas a nakapempen iti bodegada itoy nga ili ket umdas ti suplay uray pay agpaut iti innem a bulan ti kunkunada a “krisis” iti pagilian.

Kinuna ni Bulao nga adda pay parte ti Ilocos Sur iti maiyur-uray a barko a nagkarga iti 280,000 a kaban para iti Region I.

Itay nabiit, simmuyop ti presio ti bagas iti world market gapu iti ingangato ti demand iti daytoy a taraon maigapu iti bimmaba a suplay iti lubong a maitudtudo a ti panagbaliw ti tiempo, pannakaaramat dagiti talon para iti alternative fuel gapu iti ngumatngato a presio ti lana, panagpababa ti pateg ti doliar ken iti idadakkel ti populasion iti sangalubongan dagiti kangrunaan a makagapu.

Kanaig daytoy a problema, kinuna ni Pres. Gloria Macapagal-Arroyo a gumatang ti pagilian iti bagas iti Thailand ken Vietnam tapno manayonan ti pempenna a bagas.

Inwaragawag pay ti Presidente ti pannakaited iti subsidy kadagiti mannalon tapno mapadakkel ti produksion ti bagas ken imbilinna ti  pannakaingato ti presio ti irik iti P17 kada kilo tapno adda mapastrek dagiti mannalon iti apitda.

Ngem inannugot ni Bulao a nupay adu ti stock iti bodega ti NFA ditoy probinsia, kaadduanna ti naangkat manipud iti sabali a pagilian ket maaramatda laeng dagitoy inton Hulio a maibilang a lean month a manamnama a panagkisang ti bagas iti pagilian.

Masapul nga adda pempen ti NFA a bagas nga umdas a taraon dagiti umili para iti 15 nga aldaw. Ngem iti lean months manipud Hulio agingga iti Setiembre, kasapulan nga adda 30-aldaw a buffer stock ti nasao nga ahensia.

Inannugot ni Bulao a dakkel a volume ti irik ti rumrummuar iti probinsia a gatgatangen dagiti traders agsipud ta “magustuan ngamin dagiti millers ti kalidad ti bagas nga aggapu iti Ilocos Sur”.

Kinuna ni Bulao a monmonitorenda ti taray ti irik ken bagas iti probinsia ngem inyunay-unayna a saanda a masektaran ti pannakakontrol ti presio ti komersial a bagas.

Ti bagas ti kangrunaan a taraon dagiti aganay 2.5 bilion a tattao iti Asia.(Karaman ti report ni Mancielito S. Tacadena/NBN Vigan)