Banner News: Suporta iti PIA dagiti amin a media outlets iti Ilocos Sur, kiddaw ti baro nga Infocen Manager | Tawid News Magazine - Weekly Ilocos News 📰

Suporta iti PIA dagiti amin a media outlets iti Ilocos Sur, kiddaw ti baro nga Infocen Manager

VIGAN CITY — Agtultuloy a suporta dagiti amin a media outlets and organizations iti Ilocos Sur tapno maipakaammo kadagiti umili dagiti napateg nga impormasion ken kabaruanan a damag ken pasamak iti probinsia.

Dayta ti kiniddaw ni Ms. April Montes Bravo, kabarbaro nga Information Center Manager ti Philippine Information Agency iti daytoy a siudad kabayatan ti naangay a media fellowship iti Hotel Linda idi Enero 3, 2020.

Binigbig ken pinagyamanan ti baro nga Infocen Manager dagiti kameng ti media iti panangsuporta ken tulongda iti PIA iti naglabas tapno magun-od ti mision ti ahensia nga agkalap ken agiwaras ti impormasion iti probinsia ken maipadanonda iti intero a Rehion I ken iti sibubukel a pagilian.

Inaklonna a saan nga agballigi ti PIA iti misionna no awan ti suporta dagiti kameng ti media ken dagiti opisial ti Provincial Government nga idauluan ni Governor Ryan Luis Singson, ken dagiti local chief executives kadagiti amin nga ili ken siudad iti Ilocos Sur.

Impeksana ti panagyaman ti ahensiada kadagiti kameng ti media ken dagiti opisial ken agpapaay kadagiti dadduma pay a national government agencies ken kadagiti lokal a gobierno iti Ilocos Sur.

Kiniddawna kadagiti pannakabagi ti print and broadcast media iti Ilocos Sur nga itultuloyda koma ti panangsuportada iti PIA iti lideratona kas ti pannakitimpuyogda kadagiti nagkauna a mangimaton ti ahensia iti daytoy a siudad iti naglabas a panawen.

Sinukatan ni Ms. Bravo ni Ms. Imelda Castro kas Manager ti PIA Vigan a nasapsapan a nagretiro iti serbisio itay agtapos ti Disiembre.

Pinasingkedan ni Ms. Bravo nga agtultuloy ti pannakaisayangkat ti Dap-ayan Ilocos Sur babaen ti pannakikaysa ti PTV Ylocos ken dadduma pay a kameng ti print and broadcast media a pakasangailian dagiti pannakabagi dagiti nagduduma nga ahensia ti gobierno ken pribado a sektor a manglawlawag kadagiti agdama ken kabaraan nga isyu iti Ilocos Sur tapno mapakaammuan dagiti umili.

Ti PIA ket nabuangay idi Disiembre 24, 1986 babaen ti Executive Order No. 100 a pinirmaan ni Presidente Corazon Aquino kas opisial nga information arm ti gobierno ti Pilipinas.

Akem ti ahensia ti agurnong ken agiwaras kadagiti impormasion maipapan kadagiti programa, gannuat, serbisio ken proyekto ti gobierno tapno mapabileg ken mapakaammuan dagiti umili iti intero a Pilipinas.

Ti ahensia ket idauluan ti Director-General a dinutokan ken co-terminus ti Presidente, ken agakem iti salinong ti Secretary of the Presidential Communications Operations Office.  ●