Suporta iti SEAIR, naidagadag

VIGAN CITY – Indagadag ni Gov. Luis “Chavit” Singson ti panangsuporta dagiti umili iti Southeast Asian Airlines ditoy Vigan tapno agtultuloy ti operasion ti nasao a kompania ti eroplano ditoy siudad.

Pormal a nangrugi ti operasion ti  SEAIR idi Pebrero 25. Mamindua iti tunggal lawas ti biahe ti eroplano. Tunggal Biernes, sumanglad iti Vigan Airport iti alas-2 ti malem ken agsubli iti 3:30 PM, idinto a tunggal Domingo, 3:30 ti malem  ti isasangpetna ken agsubli iti 4:30 PM.

Dinawat ni Singson kadagiti umili a suportaranda ti biahe ti eroplano iti probinsia ta daytoyen ti mangiyasideg ti Ilocos Sur iti Metro Metro.

“Babaen itoy, umadu dagiti turista a pumasiar iti probinsia ket kagiddan daytoy ti panaggaraw met ti ekonomia ditoy a dakkel nga addang iti panagdur-as ti probinsia,” kinuna pay ni Singson.

“Adu rigattayo a nangkumbinsir (SEAIR management), mabayagto manen a makaawistayo nga adda agbiahe nga eroplano ditoy Vigan no ditayo suportaran,” kinuna ni Singson.

Kinuna met ni SEAIR Vice President for Flight Operations Adelberto Yap a makatulong ti SEAIR iti pannakaitandudo ti turismo iti Ilocos Sur babaen ti panagallukoyda kadagiti turista nga aglugan iti eroplano tapno pasiarenda dagiti napipintas a luglugar a masarakan iti probinsia.

Segun ken ni Yap, naannayas ti panagsanglad ti eroplano iti eropuerto agsipud ta maiyannurot ti kalawana a 1,200 a metro para iti 32-seater nga eroplanoda.

Nupay kasta, insingasing ni Uap ti pannakaipasdek iti silaw iti runway tapno mabalin ti eroplano ti sumanglad ken tumayab iti rabii, kasta met a maiyatiddog iti 500 meters ti runway tapno naannayas ti isasanglad dagiti dadakkel nga eroplano.

Kinuna ti gobernador nga immannugot dagiti mangimaton iti SEAIR a makipagperdida kadagiti damo a panagbiahe ti airline no makitinnulong dagiti agtuturay ti probinsia ken dagiti umili iti pannakasuportana.

Adda idi airline company a nangirugi iti operasionna iti Vigan ngem saan a nagbayag gapu iti panaglugina maigapu iti kakiddit dagiti aglugan a pasahero.

Sabali pay nga airline ti nangpadas a nagbiahe iti Manila-Vigan-Manila babaen ti suporta ti provincial government ngem di met nagbayag gapu iti kinangina ti plete.#