Footer

Suporta ti Candon City government kadagiti agbasbasa, agtultuloy

CANDON CITY –  Impanamnama ni Mayor Allen Singson ti panagtultuloy ti suporta ti city government kadagiti marigrigat nga agbasbasa iti elementaria, sekundaria ken kolehio iti siudad ditoy.

Kinuna ni Singson a nasurok a 200 dagiti iskolar ti city government a pabpabasaenna iti kolehio.

Iti met high school, agtultuloy ti P500 a pinansial a tulong kadagiti taga-Candon nga agbasa iti first year iti man publiko wenno pribado a pagadalan.

Iti met elementaria, libre a maiwaras dagiti bags, ken school supplies  dagiti sumrek iti Grade I.

Kinuna ni Singson a maisagsaganan dagiti maiwaras a libre a bags, ken school supplies kas iti papel, notebook, lapis, krayola, eraser ken dadduma pay a kasapulan dagiti agbasa iti Grade 1.

Nangrugi ti klase idi Hunio 15, ket nagbalin a nasayud ti umuna a klase iti Candon City Division.#