Banner News: Suporta ti gobierno, kasapulan iti pannakaparegta dagiti mannalon— Sta. Catalina mayor | Tawid News Magazine - Weekly Ilocos News 📰

Suporta ti gobierno, kasapulan iti pannakaparegta dagiti mannalon— Sta. Catalina mayor

SANTA CATALINA, Ilocos Sur — Iti sango ti nadagsen a problema a pannakaupay dagiti mannalon gapu iti nababa a presio dagiti produktoda, ken pannakadadael dagiti mulada gapu kadagiti peste ken natural a didigra, kasapulan ti naan-anay a suporta ti gobierno tapno masalbar ti agngangabit nga industria ti panagtalon.

Dayta ti reaksion ni Mayor Edgar Rapanut kadagiti kameng ti Ilocos Sur Integrated Press kabayatan ti naangay a Kapihan iti Amianan Media Forum iti pannakasaludsod ti kapanunotanna a sulusion iti problema dagiti mannalon iti ilida ken kadagiti sabali a lugar a naglak-am iti nalaka a presio ti irik, ken nadadael dagiti mulada gapu iti napaut a tudo ken nagduduma a peste.

Nasaludsod ken ni Mayor Rapanut ti reaksionna maipapan ti problema ti bumasbassiten a bilang dagiti mannalon, kas Chief Executive Officer ti ili a Santa Catalina a mabigbig kas Vegetable Bowl iti Ilocos Sur ken iti Ilocos Region gapu kadagiti nagduduma a produktoda a nateng iti naglabas, ken namaglatak ti panagmula iti lasona ken nagduduma a natnateng a sigud a maimulmula laeng kadagiti probinsia iti asideg ti Baguio City.

Nangrugi pay ti panagmula dagiti mannalon iti Santa Catalina kadagiti nagduduma a nateng idi panawen ti ama ti Mayor, daydi Atty. Porfirio Rapanut a nabayag a nagmayor kadagiti nagkauna a dekada, kas alternatibo a produkto ta saan a mayanatup ti dagada a pagmulaan ti tabako a birhinia ta agbalin a “salty” ti produktoda gapu ti kaasidegna iti baybay. Idi mayor daydi Atty. Rapanut a nayusuat pay ti panagideliber dagiti produkto ti Santa Catalina a repolio ken cauliflower sadiay Baguio City ken La Trinidad Vegetable Trading Post.

Inlawlawag ni Mayor Rapanut a nadagsen ti problema dagiti mannalon iti presio dagiti produktoda ta agdepende iti “law of supply and demand,” ket no adu ti agkasapulan ken bassit ti supply ket nangina ti presio. Inlawlawagna a kasapulan koma ti clustering ken pannakaplano a nasayaat dagiti maimula a produkto tapno saan nga agsobsobra dagiti maimula. Inlawlawagna a saan a mapawilan dagiti mayat nga agmula iti agpapada a produkto no napainamanda iti presio iti naglabas a planting season, ngem nasken a maallukoy dagiti mannalon nga agmulada iti nagduduma a produkto.

Iti pakaseknan ti idadateng dagiti didigra kas dagiti layus ken bagyo a saan a maliklikan iti Pilipinas, impaganetgetna a nasken ti pannakaiyenrol dagiti mula dagiti mannalon iti crop insurance babaen ti tulong dagiti akinsakup a lokal a gobierno tapno natalged dagiti mannalon iti mulada.

Mainaig kadagiti peste a mang-apektar kadagiti mula, inaklonna a nadagsen a problema dayta dagiti mannalon gapu ta umad-adun dagiti chemical-resistant nga insekto ken peste a mapapati a gapu ti panageksperimento dagiti mannalon kadagiti aramatenda a kemikal a pagpasuyot kadagiti mulada. Inlawlawagna a nasayaat ti konsepto ti organiko a wagas ti panagtalon ngem saan nga epektibo daytoy no dagiti kaaduan ket ti naipakadawyanen a wagas ti panagtalon ti adaptarenda.

Inaklon ni Mayor Rapanut nga adun kadagiti annak dagiti mannalon ti saan a mangayat nga aggamulo iti daga ta kaykayatdan ti sumrek kadagiti nalaglag-an a trabaho ken nasigsigurado ti masapulanda, ket tapno masolbar dayta a problema, kasapulan ti suporta ti gobierno saan laeng iti panagited kadagiti dole out a farm inputs ken alikamen, ngem kasapulan dagiti financial assistance ken nalag-an a pautang para ti puonanda, ken ti panangpatalged a sigurado a nasayaat ti presio a pagilakuanda kadagiti produktoda.

Mainaig dagiti proyekto ti imprastraktura iti ilida, impanakkel ni Mayor Rapanut a malmalpasen ti renovation ti munisipioda nga awan pulos ti pondo a nausar manipud iti Municipal Government Fund ta naggapuda iti pondo manipud iti alokasion dagiti kameng ti Kongreso. Impasingkedna ti pannakaituloy ken pannakapalagda ti sea wall iti sakup ti Santa Catalina, ken pannakaituloy ti paset ti narugianen a coastal road. Impakaammona pay ti pannakairaman iti National Expenditures Program nga insagana ti Department of Budget and Management iti nasurok a P180 Million ti gatadna a nagduduma a proyekto ti imprastraktura iti ili ti Santa Catalina iti masungad a tawen. ●