Suportaran gakat a mangted kanayonan a benepisio kadagiti barangay workers: party list rep

BAUANG, La Union- Dinawat ti maysa a party list representative a suportaran koma dagiti frontliners ti nutrision iti barangay ti impilana a gakat a mangikeddeng iti panagsueldo wenno pannakapataud ti plantilla ken mangted  iti kanayonan a benepisio kadagiti barangay workers a pakairamanan dagiti Barangay Nutrition Scholars ken Barangay Health Workers.

“No mabalin, ipatangtayo kadagiti kongresista a mangibagi iti distritoyo tapno agbalinda a co-author daytoy a gakat tapno nalaklaka a maipasa iti Kamara. Panawenen a sagrapen dagiti mangkitkita iti nutrision kadagiti barangay dagiti benepisio a katukad ti panagsakripisioda,” kinuna ni AGHAM Party List Representative Angelo Palmones bayat ti naangay a regional nutrition awarding ceremony itoy nga ili idi Disiembre 2 ditoy.

Ni Palmones ti nangputar iti House Bill 2889, maysa a gakat a mangpapigsa iti Barangay Nutrition Scholar Program, ken mangipaay kadagiti insentibo kadakuada. Adda metten naipila iti Senado a dua nga umasping a gakat, ti Senate Bill No. 9 a pinutar ni Senador Loren Legarda, a mangparnuay iti posision ti BNS iti tunggal barangay; ken ti Senate Bill No. 2397 nga impila ni Senador Bong Revilla, a mangituding iti gobierno ti panangipaayna iti maysa nga officer worker a mangiyimplementar kadagiti programa ti nutrision ti gobierno iti amin a barangay, uray dagiti adda iti gingginget a barangay.  Malaksid kadagiti siudad ken dadakkel nga ili nga agsusueldo dagiti BNS iti P4,000-P5,000, adda dagiti munisipalidad a nakurang a P1,000 ti kabaelanda nga ited kadagitoy a barangay workers.

Binabalaw  ti kongresista dagiti kapitan ti barangay a nangikkat kadagiti BNS a saanda a nakadua iti eleksion sada sinukatan iti kaduada wenno kameng ti pamiliada.

“Nagdalanen dagitoy a BNS iti adu a panagsanay ken ammodan ti umno nga aramidenda iti pannakatimbang dagiti maladaga iti barangay, saan a kas kadagiti damona a kasapulan manen a maibaon iti nadumaduma a training sakbay a maakemna ti pagrebbenganna,” innayon ni Palmones.

Ti kongresista ti nagbalin a naisangayan a sangaili bayat ti pannakapadayaw dagiti napili nga outstanding BNS ken Green Banner awardee iti rehion.

Napili kas Most Outstanding Barangay Nutrition Scholar ni Lolita Dacanay manipud iti Mangga, Aringay, La Union; maikadua ni Angelyn Castillo ti Nalasin, Bangui, Ilocos Norte; ken maikatlo ni Widna Galuardo ti Calumbaya, Galimuyod, Ilocos Sur. Naikkan met iti special citation ni Lourdes Frias, maysa a BNS manipud iti Poblacion, Basista, Pangasinan.

Inyalat met ti Ilocos Sur ti Regional Green Banner Award para iti provincial category. Nagpuesto ti Ilocos Norte ken Pangasinan iti maikadua ken maikatlo a puesto kas panagsaganadda.

Iti city category, napadayawan ti Vigan City idinto nga adda iti maikadua ken maikatlo ti Laoag City ken Candon City.

Iti municipal level category, naited ti pammadayaw iti Burgos, Pangasinan idinto a maikadua agingga iti maikapat ti Bangolin, La Union; San Emilio, Ilocos Sur ken Bangui, Ilocos Norte.#