Supplemental feeding program, maisayangkat

CABUGAO, Ilocos Sur – Manamnama a rugian ti Cabugao Central School nga ipatungpal ti supplemental feeding program ti Department of Education inton Septiembre 14, daytoy ti naammuan manipud ken ni Annabel Ancheta, school canteen coordinator itay nabiit.

Maipakat ti supplemental feeding kadagiti undernourished nga ubbing nga agbasbasa manipud iti kindergarten agingga iti Grade VI ditoy a pagadalan.

Kabayatanna, madama met a maisaysayangkat ti supplemental feeding program kadagiti ubbing nga agbasbasa iti day care centers a nangrugi idi Agosto daytoy a tawen.

Kinuna ni MSWD Officer Lydia S. Gazmen, inaldaw a maikkan iti supplemental feeding dagiti ubbing iti las-ud ti innem a bulan kas paset ti programa ti nasao nga ahensia a panangpukaw iti malnutrision kadagiti ubbing, nangruna dagiti agad-adal kadagiti day care centers.

Mismo a dagiti day care workers ti mangimaton iti pannakapakan kadagiti ubbing.#