Supplementary feeding maipapaay kadagiti day care pupils

MAGSINGAL, Ilocos Sur – Kas paset ti programana a mangpukaw iti malnutrision kadagiti agbasbasa iti Day Care Centers ditoy nga ili, mangipapaay ti lokal a gobierno iti supplementary feeding kadagiti day care pupils.

Kinuna ni Day Care Federated President Merlita Soliven nga adda amin bingay dagiti 30 a Day Care Centers iti simmangpet a bagas ket agdagup iti 719 Day Care pupils ti benepisario iti supplemental feeding program ti lokal a gobierno ditoy.

Agpaut iti 120 days ti supplementary feeding dagiti Day Care pupils a nakapakananda tunggal Lunes, Mierkules ken Biernes.

Agdagup iti P1,054,560.00 ti naiyalokar a pondo para iti supplementary feeding program ti lokal a gobierno ditoy para kadagiti agbasbasa iti Day Care Centers iti daytoy a tawen.#