Supplementary feeding maiwayat day care pupils ti Cabugao

CABUGAO, Ilocos Sur – Naangay ti Day Care Workshop on Supplementary Feeding Program a nakipartisiparan dagiti 32 a day care workers iti conference building ditoy nga ili idi Hunio 23.

Segun ken ni Cabugao Municipal Social Welfare Officer Lydia S. Gazmen, panggep ti nasao a workshop ti pannakaisagana ti pakabuklan ti budgetary requirements iti daily menu para iti supplementary feeding program ti opisinada para kadagiti ubbing nga agbasbasa iti day care ditoy nga ili.

Kinuna ni Gazmen nga adda umanay nga alokasion para iti daytoy a feeding program a pagbuligan ti DSWD ken ti lokal a gobierno ti Cabugao nga idadauluan ni Mayor Edgardo S. Cobangbang, Jr.

Kinuna pay ni Gazmen a maipatungpal ti feeding program babaen ti panagkikinnamayet ti LGU-Cabugao, DSWD Regional Field Office 1, Day Care workers ken dagiti nagannak tapno mapukaw ti malnutrision ditoy nga ili, nangruna kadagiti ubbing nga agbasbasa iti day care.

Marugian inton Agosto ti nasao a programa ket maminlima a daras iti kada lawas a mapakan dagiti day care pupils iti las-ud ti innem a bulan. (Joed Sajonia)