Footer

Surat ti Ama Iti Anakna Iti Filipinas

 1.
agkaradap manen ti sipnget ditoy Jersey City

malmaldayak, Anakko
idinto nga agtudtudo iti niebe iti ruar
uppaten a kasukot ti aruatek
ngem kaskasdi a tumulang ti lamiisna
kayatkon ti agawid
iti ikut ti ipatpategtayo a pagilian…
iti ikub ti siwayawaya ken naragsak a panagbiag
ditoy arigko itay naitangkal a tumatayab
ta robot dagiti tattao ditoy
awananda iti utek ken kararua
dida am-ammo ni Apo Hesukristo
a nailansa iti Krus
ngamin ti doliar ti bigbigenda a dios

 
2.
agtigtigergerak iti butengko, Anakko
kadagiti kinapudno a maimutektekak iti inaldaw
iti saklot daytoy a paset ti lubong
ta ti dayaw ti tunggal parsua
awan  aniamanna kadakuada
agassawada no agkaiddada iti rabii
iti aldaw awan bibiangda iti tunggal maysa
ti lalaki addaan iti babai
ti babai addaan met iti lalaki…
kasta ti panagtayyek ti biag ditoy
pudno a maulawak
ket ita, ammokon ti panurnorem a dalan, Anakko
ngem taliawem koma ti naggapuam
punasem agaribasay a lua ni Luzviminda

 3.
tapno makagtengka iti papanam
ammok metten nga iti ungto ti bullalayaw ti biagmo
addan nga agur-uray ti nalayog a balligim.