Surfing competition, mangidur-as iti sports, turismo, ekonomia: Cong. Singson

CABUGAO, Ilocos Sur – Kinuna ni Congressman Singson nga inggannuatna ti  ti pasalip ti surfing kas panangidur-as iti sports, turismo ken panangital-o iti lokal nga ekonomia ti probinsia, kangrunaan daytoy coastal barangay ditoy.

“Tapno maital-o ti ekonomia, agibauttayo iti puonan, sumangpet dagiti turista, maipatakder dagiti pagtagilakuan, agtaray ti komersio,” kinuna ti pannakabagi ti Umuna a Distrito ti probinsia iti panagbitlana iti panaglukat ti Congressman Ronald Singson Inaugural Surfing Cup iti Kido’s Point ditoy itay Disiembre 10-13 a dimmar-ayan dagiti municipal officials nga indauluan ni Mayor Diocaesar Suero, dagiti barangay officials iti panangipangulo ni Barangay Captain Francisco “Paco” Savellano ken  nakipartisiparan dagiti nasurok 80 a surfers manipud kadagiti nadumaduma a probinsia ken siudad a pakairamanan ti La  Union; Siargao; Lanuza; Daet, Camarines Norte; Baler, Quezon; Samar; National Capital Region; Baguio ken dagiti taga- Ilocos Sur.

Naigiddan a naluktan iti daytoy nga aldaw ti  kaipatpatakder a multi-purpose building iti Barangay Sabang. Daytoy ti umuna nga infrastructure project ni Congressman Singson a napunduan iti  P5 milion  manipud iti Countrywide Development Fundna.

Kinuna ni Singson nga ipaimanan kadagiti taga-Sabang ti pannakamanehar ti two-story multipurpose building nga addaan iti conference hall, function rooms ken convenient rooms a mabalin nga ipaupa no adda agkallaysa, agpabuniag ken agkasangay.

“Nagbalinen nga entrepreneur dagiti taga-Sabang,” kinuna ni Singson idinto a dinakamatna nga iti pannakaangay ti surfing competition ditoy, timmakder dagiti adu a tienda.

Kinuna ni Singson a ni  Presidential daughter Luli Arroyo,  a naasideg a pagayamna, ti nangisuro kenkuana iti surfing sadiay Siargao, maysa kadagiti kapintasan a surfing site iti Pilipinas.  

"Makunak a maysaak metten  a surfer ta iti namintallo a daras a pinadasko daytoy nga ay-ayam, nakatakderak met," kinuna pay ti diputado.

Idi napan a tawen, ditoy ti nakaaramidan ti final competition ti National Surfing Federation.

Ti Barangay Sabang ti maysa kadagiti natakuatan a napintas a surfing site babaen kadagiti local surfers ti probinsia gapu ta dadakkel dagiti allon ditoy a kasapulan iti kastoy a klase ti  sports.

Inawagan dagiti local surfers  ti Kido’s Point daytoy a surfing site a naadaw iti nagan ti maysa a residente ditoy a nalaing nga ag-surf.

Kinuna ti maysa a surfer manipud Siargao a nakapatpatang ti Tawid News a saan a paatiw ti pintas ti  Kido’s Point, Sabang kadagiti sabali pay a surfing site.

Impatalged ni Singson ti suportana kadagiti agessem iti daytoy nga sport. Ti diputado ti mangis-isponsor kadagiti agarup pitopulo a  local surfers ditoy probinsia iti pannakisalipda kadagiti national surfing competitions.

Inkari pay ni  Singson nga angayenna a tinawen ti nadakamat a kompetision aglalo ita ta napukawen ti Philippine Surfing Federation nga idauluan idi ni sigud a Surigao representative Prospero Pichay.

Dagiti sumaganad dagiti gunggona: Open Men’s Division –  champion,  P30,000; 1st runner-up; P20,000, 2nd runner-up, P15,000; ken 3rd runner-up, P10,000; Junior Division – champion, P15,000; 1st runner-up, P10,000;  2nd runner-up, P8,000 ken 3rd runner-up, P5,000; Women’s Special Division –  finalists, sag-tunggal P2,000. (Jane Ballad/Mancielito S. Tacadena, NBN Vigan)